Ծեծի էր ենթարկել կնոջը, ապա կրակոցներ արձակել աներոջ մեքենայի ուղղությամբ

Նոյեմբերի 29-ի ժամը 03.31-ին ՆԳՆ ոստիկանության օպերատիվ կառավարման կենտրոն զանգած քաղաքացին հայտնել էր, որ դստեր ամուսինը, լինելով ոչ սթափ վիճակում, ծեծի է ենթարկել դստերը, իսկ երբ ինքը դստեր ու թոռների հետ իր մեքենայով հեռացել է նրա տնից, փեսան որսորդական հրացանից կրակել է մեքենայի ուղղությամբ: Քաղաքացին նաև հայտնել է, որ փեսան սպառնացել է գալ իր տուն և կրակել իրենց:

Ոստիկանության Մալաթիայի բաժնից մեկնած օպերատիվ խումբը պարզել է, որ ժամը 02.30-ին Շահումյան 4-րդ փողոցի տներից մեկում 25-ամյա կինը կենցաղային հարցերի շուրջ վիճաբանել է 36-ամյա ամուսնու հետ, նա էլ, լինելով ոչ սթափ վիճակում, 2 և 4 տարեկան երեխաների ներկայությամբ ծեծի է ենթարկել կնոջը: Իսկ երբ աղջկա հայրը դստեր ու թոռների հետ իր «Նիսան» մակնիշի մեքենայով փորձել է հեռանալ, 36-ամյա տղամարդը, շատերի կյանքի համար վտանգավոր եղանակով, կրակոցներ է արձակել մեքենայի ուղղությամբ՝ վնասելով դուռը:

Նախաձեռնվել է քրեական վարույթ:

Շահումյան 4-րդ փողոցի նշված տանը կատարված խուզարկությամբ հայտնաբերվել են 12 մմ տրամաչափի որսորդական ողորկափող հրացան, ինքնաձիգի նմանվող ողորկափող հրազեն և տարբեր տրամաչափի 94 փամփուշտ:

Նոյեմբերի 30-ի գիշերը, ժամը 2.20-ին, 36-ամյա տղամարդը ինքնակամ ներկայացել է ոստիկանության Մալաթիայի բաժին: Նա ձերբակալվել և ներկայացվել է վարույթն իրականացնող մարմին:

Նախաքննությունը շարունակվում է:

Հիշեցնենք, որ այսօր առավոտյան ArmLur.am-ը գրել էր, որ սպանության փորձ է կատարվել Երեւանում։

ArmLur.am-ին հասած տեղեկությունների համաձայն՝ Շահումյան փողոցի բնակիչները լսել են, որ շենքի բնակիչներից ամուսինները վիճաբանում են, ամուսինը դաժան ծեծի է ենթարկում կնոջը։ Արդյունքում՝ բնակիչները նկատել են, որ կնոջ հայրը դստերը ու թոռանը վերցրել է ու մեքենայով փորձել են հեռանալ տանից։

Մեզ հասած տեղեկությունների համաձայն՝ փեսան իրեն պատկանող որսորդական զենքով 4 կրակոց է արձակել մեքենայի ուղղությամբ, ինչից վնասվել է մեքենայի դուռը։ Իրավապահները փնտրում են եւ զենքը եւ զենքից կրակոց արձակողին։