Լուսնի վրա չեն ապրում, բայց Հայաստանի հետ էլ կապ չունեն

ՀՀ Աժ-ի այսօրվա նիստի քննարկումներն ընթանում էին կիսադատարկ դահլիճում: Թվում էր `  տրանսպորտի մասին քննարկումը, որը պետք է հուզի  յուրաքանչյուր քաղաքացու, կարող էր «ստիպել» մեր պատգամավորներին  չլքել դահլիճը: Սակայն եղավ այն, ինչ եղավ:

Հիմնականում իշխող պատգամավորների ու ԲՀԿ-ականների  մեծ մասը ներկա  է լինում այն ժամանակ, երբ  կյանքի և մահու օրինագծի  ընդունման համար անհրաժեշտ է  քվորում  ապահովել: Այս  և այլ օրինագծերին պատգամավորների բացակայությունը հերթական անգամ հիշեցնում է `  մեր  իշխանական այրերը  Հայաստանում «չեն ապրում», չնայած Շարմազանովը  այսօր հայտարարեց, որ իշխող կուսակցության ներկայացուցիչները լավ գիտեն սեփական ժողովրդի խնդիրները, չէ՞ որ նրանք Լուսնի վրա չեն ապրում:

Սակայն կիսադատարկ դահլիճները քննարկվող  օրինագծերի նկատմամբ անտարբերությունը հերթական անգամ ցույց  է տալիս, որ մեր այրերը չեն ապրում ժողովրդի դարդ ու ցավով:

Իսկ տրանսպորտի մասին օրենքում փոփոխություններ ու լրացումներ կատարելու մասին նախագծի նկատմամբ անհետաքրքրությունը  մեկ պարզ  բացատրություն ունի՝ սեփական ու թանկարժեք մեքենաներով երթևեկելով՝ մեր  «ընտրյալները » վաղուց մոռացել  են թե հանրային տրանսպորտը, թե այդ ոլորտի խնդիրները:                                                                    Ի դեպ, վերջին երկու օրերին  օրվա երկրորդ կեսից բացակայում  է նաև ՀՀ ԱԺ նախագահ Հովիկ Աբրահամյանը,  երբեմն էլ  ԱԺ մյուս փոխնախագահ Հերմինե Նաղդալյանը:

Սոնա Դավթյան