Գյումրիում եղել է ստվերային կառավարում. արտաքին ուժերի կողմից որոշումներ են կայացվել. Գյումրիի ավագանու ՔՊ խմբակցության ղեկավար

ArmLur.am-ի զրուցակիցը Գյումրիի ավագանու «Քաղաքացիական պայմանագիր» խմբակցության ղեկավար Քնարիկ Հարությունյանն է:

-Տիկի՛ն Հարությունյան, թեև «Բալասանյան» դաշինքի հետ համագործակցության հուշագիրը խզելուց հետո հայտարարել եք, որ որպես ընդդիմություն եք դիրքավորվում, բայց համացանցում, ինչպես նաև հանրության շրջանում, շատ է քննարկվում այն հարցը, որ պատրաստվում եք Գյումրիում նույն սցենարը կրկնել, ինչ՝ Ալավերդիում, այսինքն՝ պաշտանանկ անեք համայնքապետին, որը «Բալասանյան» դաշինքից է:

-Մենք հայտարարել ենք, որ մեր լիազորություններն իրականացնելու ենք ավագանու 11 մանդատով, այսինքն՝ մենք մեր աշխատանքը պատկերացնում ենք 11 մանդատի լիազորությունների շրջանակում: Կլինեն նախագծեր, որոնք եթե լավը լինեն ու բխեն մեր քաղաքացիների շահերից, բնականաբար, այդ նախագծերի օգտին մենք կողմ կքվեարակենք և պատրաստ կլինենք համագործակցության, կլինեն նաև նախագծեր, որոնց մեջ խնդրահարույց կետեր կտեսնենք, բնականաբար, այդ նախագծերը մեր կողմից կմերժվեն:

Ինչ վերաբերվում է քաղաքապետին անվստահություն հայտնելուն՝ մենք ունենք ընդամենը 11 մանդատ և այդ մանդատով իմպիչմենտի հարց առաջ քաշել հնարավոր չէ, սա թույլ չի տալիս որևէ գործընթաց սկսել:

-Վերջերս Գյումրու ավագանու «Զարթոնք» խմբակցության ղեկավար Վարդեւան Հակոբյանը հայտարարեց, որ չի բացառում ՔՊ-ի հետ հնարավոր համագործակցությունը՝ Գյումրու քաղաքապետ Վարդգես Սամսոնյանին պաշտոնանկ անելու գործընթացին։ Մյուս ուժերի հետ նման հարց քննարկե՞լ եք:

-Մենք որևէ այլ ուժի հետ քննարկում այդ հարցով չունենք, որևէ բանակցություն չենք վարել ու չենք վարում:

-Ինչպես ՔՊ-ն իր պաշտոնական հաղորդագրության մեջ է պարզաբանել՝ «Բալասանյան» դաշինքի հետ համագործակցության դադարեցման պատճառը եղել է այն, որ պայմանավորվածությունները չեն պահպանվել, Գյումրիում ստվերային կառավարում է իրականացվել՝ արտաքին ուժերի միջամտությամբ: Ի՞նչ նկատի ունեք՝ արտաքին ուժեր ասելով:

-Մենք բազմիցս մեր աշխատանքում առնչվել ենք այդ խնդրին, այն պայմանավորվածությունները, որոնք ձեռք ենք բերել «Բալասանյան դաշինք»-ի հետ, դրանք տարօրինակ կերպով չեն իրականացվել: Մենք ունենք համոզմունք , որ եղել է ստվերային կառավարում, այսինքն՝ քաղաքապետարանում եղել է արտաքին ուժերի կողմից միջամտություն, հակառակ դեպքում, ես չեմ կարող բացատրել ՝ ինչու մեր պայմանավորվածությունները ի կատար չեն ածվել

-Որո՞նք են այդ արտաքին ուժերը։

-Արտաքին ուժերի՝ բառիս ամենալայն իմաստով, այսինքն՝ ուժեր, որոնք քաղաքապետարանում որևէ լիազորություն չեն ունեցել որոշում կայացրել, բայց կայացրել են համապտատասխան որոշումներ

-Եթե նման հայտարարություններ եք անում, որ ստվերային կառավարում է իրականցվել Գյումրիում և արտաքին ուժերի միջամտություն է եղել, ինչու՞ դատախազություն չեք դիմում, որպեսզի իրավական տիրույթում հարցը լուծվի։

– Այն տեքստը, որը մեր քաղաքական ուժը հրապարակել է, բաց է, հանրային է, եթե իրավապահ մարմինները կգտնեն, որ մեր հայտարարության մեջ կան տարրեր, որոնք անհրաժեշտ են ուսումնասիրության, ապա այդ գործը կնախաձեռնեն: Մենք այս մասով բաց ենք, թափանցիկ ենք և պատրաստ ենք համագործակցության: Հավելեմ նաև, որ Ժուռնալիստների «Ասպարեզ» ակումբի հիմնադիր Լևոն Բարսողյանը հաղորդում է տվել Դատախազություն:

Քրիստինա Մուշեղյան