Ադրբեջանը մեծ խոչընդոտներ չի տեսնում իր հարևան Հայաստանի հետ կայուն խաղաղության պայմանագրի ապահովման համար և կարծում է, որ իրենց սահմանների որոշման հարցը կարող է լուծվել առանձին, Reuters-ի փոխանցմամբ՝ այսօր Լոնդոնում լրագրողներին ասել է Ադրբեջանի նախագահի օգնական Հիքմեթ Հաջիևը։
«35 տարի տևող հակամարտությունն այժմ ավարտված է։ Ադրբեջանի ռազմավարությունն այժմ խաղաղություն ձեռք բերելն է։ Խաղաղության պայմանագիրը հրթիռային գիտություն չէ։ Ադրբեջանի համար խաղաղ օրակարգի ճանապարհին այլևս խոչընդոտներ չկան»,- ասել է նա։
Հարավային Կովկասի հարևանները վերջին 30 տարում երկու պատերազմ են մղել Լեռնային Ղարաբաղի համար, սակայն այս ամիս կազմակերպել են գերիների փոխանակում և համատեղ հայտարարություն տարածել՝ ասելով, որ ցանկանում են կարգավորել հարաբերությունները և հասնել խաղաղության համաձայնագրի, գրում է Reuters-ը։
Միացյալ Նահանգները, Եվրամիությունը և Ռուսաստանը տասնամյակներ շարունակ փորձել են միջնորդ լինել երկու կողմերի միջև, սակայն Հաջիևն ընդգծել է ուղիղ երկկողմ բանակցությունների կարևորությունը, որոնք, ըստ նրա, կշարունակվեն հաջորդ տարի:
«Ղարաբաղը վերագրավելուց հետո Ադրբեջանը գնալով ավելի թշնամաբար է տրամադրված համաձայնագրի միջնորդության մեջ արտաքին ներգրավվածության նկատմամբ: Ալիևը մեղադրել է Միացյալ Նահանգներին հարաբերությունները վտանգելու մեջ՝ կանգնելով Հայաստանի կողքին, իսկ Հաջիևը բանակցությունների հարցում ԱՄՆ-ի ղեկավարած մոտեցումը անվանել է շեղված»,- գրում է աղբյուրը:
Երկու հարևանների միջև չլուծված խնդիրների թվում է նրանց ընդհանուր սահմանի շուրջ համաձայնության բացակայությունը, որոնցից յուրաքանչյուրն ունի փոքր անկլավներ՝ շրջապատված մյուսի տարածքով:
Հայաստանի վարչապետ Նիկոլ Փաշինյանը նախորդ ամիս ասել էր, որ դա բանակցությունների հարց է։ Հաջիևը նշել է, որ Բաքուն պատրաստ է քննարկել այն, սակայն «սահմանների սահմանազատման հարցը պետք է առանձին մնա խաղաղության պայմանագրի քննարկումներից»:
Ղարաբաղի 120,000 էթնիկ հայերի մեծ մասը տեղահանվել է Հայաստան այն բանից հետո, երբ Ադրբեջանը վերցրել է այդ տարածքը: Հայաստանը դա որակել է որպես էթնիկ զտում. Բաքուն նշում է, որ նրանք կարող էին մնալ և ինտեգրվել Ադրբեջանին։
.gif)
