ԲՀԿ մամլո խոսնակ Տիգրան Ուրիխանյանից այսօր Armlur.am լրատվականի թղթակիցը փորձեց պարզել ՝ ինչու են շրջանառվող լուրերի համաձայն ԲՀԿ երիտասարդները «Հայկական ժամանակ» օրաթերթի ու «1in.am» կայքի խմբագրությունների դիմաց կազմակերպել են բողոքի ակցիա, որի ընթացքում բացականչել են դհոլ-դհոլ:
– ԲՀԿ երիտասարդնե՞րը (մամլո խոսնակը զարմացավ-խմբ.):
-Այո, ասում են ՝ շրջանառվող լուրերի համաձայն, ակցիան կազմակերպել են ԲՀԿ երիտասարդները:
-Եթե ես ամեն անգամ մեկնաբանեմ բոլոր նրանց խոսակցությունները, ովքեր ասում են, իմ և մի քանի մարդկային կյանք բավական չի լինի: Եթե կա կոնկրետ տեղեկատվություն, դրա վերաբերյալ հղեք կոնկրետ հարցադրում:
-Ինչո՞վ կբացատրեք այն հանգամանքը, որ այդ բողոքի ակցիաները լուսաբանել է միայն «Կենտրոն» հեռուստաընկերությունը:
–Որևէ կապ մեկը մյուսի հետ չունի, քանի որ «Կենտրոն» հեռուստաընկերությունը, ինչպես Դուք և բազմաթիվ այլ լրատվամիջոցներ լուսաբանում են ամեն ինչ, որն ուշագրավ է, և այն ինչ տեղի է ունենում մեր երկրում ընդհանրապես:
-Այսինքն ՝ Դուք հերքո՞ւմ եք, որ այդ ամենի հետ ԲՀԿ երիտասարդները կապ ունեն:
-Գիտեք ես չեմ բացառի, որ միլիոնավոր ժողովրդի մեջ կան 100.000 ԲՀԿ անդամներ, որոնք ակտիվ քաղաքացիներ են և եթե որևէ տեղ ինչ-որ բան է տեղի ունենում, կարող են մասնակցել, բայց դա չի նշանակում, որևէ այլ բան: Ինչ վերաբերում է լրատվամիջոցներին, նրանք պիտի այնպիսի գործունեություն իրականացնեն, որ չառաջացնեն հանրության զայրույթը, որպեսզի տեղի չունենան նման ակցիաներ:
-Այսինքն ՝ դուք նկատի ունեք, որ ԲՀԿ անդամներն ինքնաբուխ կարող են ակցիա կազմակերպել:
-Ոչ, ես բոլորովին այլ բան եմ ասում:Եթե ժողովրդի որևէ հատված ինչ-որ բան է կազմակերպում, այդտեղ կարող են լինել ԲՀԿ, ինչու չէ նաև ՀՀԿ, ՀԱԿ կամ այլ կուսակցության անդամներ:
Սոնա Դավթյան
.gif)
