ՀԱՊԿ խաղաղապահները զսպող դեր են ունեցել Ղազախստանում անկարգությունների ժամանակ. Տոկաև

Հավաքական անվտանգության պայմանագրի կազմակերպության (ՀԱՊԿ) խաղաղապահ զորախումբը զսպող դեր ունեցավ 2022 թվականի հունվարին Ղազախստանում տեղի ունեցած անկարգությունների ժամանակ։ Այս հայտարարությունն արել է երկրի նախագահ Կասիմ-Ժոմարտ Տոկաևը։

«Շեշտում եմ, որ դիմումը եղել է ոչ թե Ռուսաստանին, այլ ՀԱՊԿ-ին, որի անդամ է Ղազախստանը։ Դիմելու պահին կազմակերպության նախագահը Հայաստանն էր, իսկ այս տարի նախագահությունն անցավ Ղազախստանին»,- ասել է Տոկաևը «Egemen Qazaqstan»–ի հետ զրույցում։

Նա ընդգծել է, որ ՀԱՊԿ խաղաղապահները չեն մասնակցել հակաահաբեկչական գործողությանը և ոչ մի կրակոց չեն արձակել։ Կազմակերպության անդամ երկրների հետ պայմանավորվածության համաձայն` ՀԱՊԿ խաղաղապահ զորախումբը երկրից հեռացել է առանց որևէ նախապայմանի և ժամկետից շուտ։
Հիշեցնենք` Ղազախստանում բողոքի զանգվածային ցույցեր սկսվեցին 2022 թվականի հունվարի առաջին օրերին։ Հունվարի 4–ին և 5-ին Ալմաթիում բախումներ եղան ցուցարարների և ուժայինների միջև։

Հունվարի 5-ին Ղազախստանի նախագահ Կասիմ Ժոմարտ-Տոկաևը ստորագրեց երկրի կառավարության հրաժարականի մասին հրամանագիրը։

Նույն օրը նա երկրում երկշաբաթյա արտակարգ դրություն մտցրեց։ Տոկաևն օգնության համար դիմեց Հավաքական անվտանգության պայմանագրի կազմակերպությանը, և ՀԱՊԿ-ն իրավիճակը կայունացնելու համար խաղաղապահ զորախումբ ուղարկեց Ղազախստան, որոնց թվում 100 զինծառայող կար Հայաստանից։

ՀԱՊԿ-ում ընդգրկված են Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանը: