Ժամանակն օրհասական էր, իսկ հապաղելը՝ կործանարար. Ազնավուրի անցած ճանապարհն արցախյան պատերազմների ժամանակ

Ազնավուր Վարուժանի Սաղյանին 2023թ. Արցախյան վերջին պատերազմից հետո բոլորը կհիշեն՝ որպես անձնուրաց, ժողովրդասեր, հավասարակշռված ու իրական առաջնորդի հատկանիշներով օժտված քաղաքապետի: Ազնավուր Սաղյանը ծնվել է 1989 թ. ապրիլի 26-ին Արցախի Հանրապետության Մարտունի քաղաքում: Սովորել է Արցախի պետական համալսարանի Ֆիզմաթ ֆակուլտետում և ստացել մաթեմատիկա և ինֆորմատիկա բակալավրի մասնագիտություն:

2007-2009թթ. ծառայել է Արցախի Պաշտպանության բանակում՝ ՀՕՊ ստորաբաժանումում: Ծառայության ընթացքում իրեն դրսևորել է որպես կարգապահ և բանիմաց զինվոր և նշանակվել ջոկի հրամանատար:

2016թ. ակտիվորեն մասնակցել է ապրիլյան քառօրյա պատերազմին, որը գնահատվել է Մարտական ծառայություն մեդալով:

Զինակից ընկերների խոսքով՝ 2020թ. պատերազմի ժամանակ անուրանալի հետք է թողել նրա անձնվեր գործունեությունը: Կազմակերպել է զորահավաքային ռեսուրսների ազդարարումը և հավաքագրումը, խաղաղ բնակչության տարհանման աշխատանքները, իսկ ռազմաճակատում ակտիվ մասնակցություն է ունեցել ռազմական գործողություններին՝ Մարտունի քաղաքի պաշտպանության ժամանակ: Ազնավուրի զինակից ընկերները հիշարժան են համարում հատկապես այն, որ Ազնավուրն իր երեք ընկերների հետ կազմակերպեց և իրագործեց անիրագործելի թվացող գործողությունը, երբ գրոհով ետ վերադարձրին կորսված դիրքը՝ հնգապատիկ գերազանցող թշնամու զորքերից: Ինչպես զինակից ընկերներն են ասում՝ դիրքը անմիջապես սպառնում էր Մարտունի քաղաքին և վերահսկում տարածքի ողջ ճանապարհները:

Ազնավուրը 44-օրյա պատերազմից հետո ընտրվում է Մարտունու քաղաքապետ և ձեռնամուխ լինում հայրենի ավիրված քաղաքի վերականգմանը:
Armlur.am-ը կապ է հաստատել նաև Ազնավուրի հորաքրոջ աղջկա՝ Մարիամի հետ, ով մեզ հետ զրույցում պատմել է Անձնավուրի մասին.

«Բնավորությամբ շատ հանգիստ մարդ էր Ազնավուրը, նվիրված բոլորին՝ ընտանիքին, ընկերներին, հայրենիքին: Մեզ համար նա բոլորից առավել էր, առաջին հերթին Ազնավուրն էր, հետո՝ մնացածը, նույնիսկ մենք: Նա իր ամեն մի քայլով էր շահել մեր այդ վերաբերմունքը: Անկեղծ, նա բոլորի համար լավ մարդու օրինակ էր: Նրա հետ աշխատողները միշտ ասում էին, թե ինչպես է անում, որ բոլորը իրենից գոհ են լինում: Միշտ պետք է բոլոր քաղաքացիների պահանջները կատարեր, դրա համար նրան բոլորը սիրում էին, մեծից՝ փոքր»:

2023թ. սեպտեմբերի 19-ին սկիզբ առած պատերազմն, ինչքան կանխատեսելի էր, նույնքան էլ՝ անսպասելի: Ժամանակն օրհասական էր, իսկ հապաղելը՝ կործանարար: Սակայն Ազնավուրը նույն կազմակերպվածությունն ու անձնվիրությունը ցուցաբերեց նաև այս վերջին պատերազմին՝ հավաքելով ողջ մարտունեցի տղամարդկանց և առաջինը մեկնելով ռազմի դաշտ: Նույն օրը՝ սեպտեմբերի 19-ին, սիրելի քաղաքի մատույցներում էլ զոհվում է Մարտունու հավերժ քաղաքապետ Ազնավուր Սաղյանը:

Ամուսնացած էր, ունի երեք երեխա: