ԱԺ-ն Կոռուպցիայի կանխարգելման հանձնաժողովի անդամի թեկնածուի մրցույթ է հայտարարել. ովքեր կարող են առաջադրվել

Հիմք ընդունելով «Կոռուպցիայի կանխարգելման հանձնաժողովի մասին» ՀՀ օրենքի 𝟏𝟎.𝟐-րդ հոդվածի պահանջները՝ Ազգային ժողովի նախագահը հայտարարում է Կոռուպցիայի կանխարգելման հանձնաժողովի (այսուհետ՝ Հանձնաժողով) անդամների պաշտոններում թեկնածուների ընտրության մրցույթ:

Թեկնածուին ներկայացվող պահանջներն են՝

🔷միայն Հայաստանի Հանրապետության քաղաքացիություն,
բարձրագույն կրթություն,

🔷հայերենին տիրապետում,

🔷առնվազն հինգ տարվա աշխատանքային ստաժ, որից առնվազն երեք տարին՝ քաղաքական, ինքնավար, վարչական կամ օրենքով ստեղծված պետական մարմնի անդամի պաշտոններում կամ կազմակերպման, ղեկավարման, վերահսկման, համակարգման գործառույթներ ունեցող այլ պաշտոններում (անկախ պետական կամ մասնավոր ոլորտում կատարած աշխատանքից):

Մրցույթին մասնակցել ցանկացողները Ազգային ժողովի աշխատակազմին են ներկայացնում հետևյալ փաստաթղթերը.

𝟏) դիմում,

𝟐) անձը հաստատող փաստաթղթի պատճենը,

𝟑) 𝟑𝐱𝟒 սմ չափսի երկու գունավոր լուսանկար,

𝟒) ինքնակենսագրություն,

𝟓) բարձրագույն կրթության փաստը հավաստող փաստաթղթ(եր)ի պատճեն(ներ)ը.

𝟔) հայերենին տիրապետելու հանգամանքը հավաստող փաստաթղթի պատճենը (ատեստատ, դիպլոմի միջուկ և այլն),

𝟕) անհրաժեշտ աշխատանքային ստաժը հավաստող փաստաթղթի պատճեն(ներ)ը,

𝟖) արական սեռի հավակնորդի դեպքում՝ պարտադիր զինվորական ծառայություն անցած լինելու հանգամանքը հավաստող կամ այլընտրանքային ծառայություն անցած լինելու կամ պարտադիր զինվորական ծառայությունից ազատված լինելու փաստը հավաստող փաստաթուղթ,

𝟗) բարեվարքության վերաբերյալ լրացված հարցաթերթիկ (rb.gy/zo9n07)

𝟏𝟎) դատավորի պաշտոնում նշանակմանը խոչընդոտող ֆիզիկական արատների և հիվանդությունների բացակայության մասին Կառավարության սահմանած կարգով տրված փաստաթուղթ (rb.gy/1sh894)

𝟏𝟏) իրավասու մարմնի կողմից տրված փաստաթուղթ՝ միայն Հայաստանի Հանրապետության քաղաքացի հանդիսանալու վերաբերյալ,

𝟏𝟐) իրավասու մարմինների կողմից տրված փաստաթուղթ դատվածություն չունենալու՝ անկախ դատվածությունը մարված կամ վերացված լինելու հանգամանքից, ոչ ռեաբիլիտացնող հիմքերով քրեական հետապնդումը դադարեցված լինելու, քրեական հետապնդման բացակայության մասին,

𝟏𝟑) գրավոր հայտարարություն՝ որևէ կուսակցության անդամ չհանդիսանալու մասին.

𝟏𝟒) համաձայնություն՝ իր վերաբերյալ պետական և տեղական ինքնակառավարման մարմիններից և պաշտոնատար անձանցից օրենքով սահմանված անհրաժեշտ տվյալներ և այլ տեղեկություններ ստանալու մասին:

Մրցույթն անցկացվելու է երկու փուլով՝ փաստաթղթային ստուգման և հարցազրույցի: Մրցույթի հարցազրույցի փուլը կանցկացվի «Հարցարան»-ի (rb.gy/ypttcf) հիման վրա:

Ըստ Մրցութային խորհրդի սահմանած Կարգի՝ (rb.gy/4qnyml) մրցույթի արդյունքում հավակնորդը կարող է ստանալ առավելագույնը 𝟏𝟎𝟎 միավոր, որից 𝟔𝟎 միավորը մասնագիտական փորձի, անձնական որակների և հմտությունների համար, իսկ 𝟒𝟎-ը՝ Հանձնաժողովի անդամի կարգավիճակին վերաբերող հիմնարար իրավական ակտերի պահանջների իմացության:

Թեկնածուի գնահատման ենթակա պահանջների բովանդակությունը բացահայտող չափանիշները, չափանիշներից յուրաքանչյուրի գնահատման առավելագույն միավորը և մասնակցի գնահատման հարցաթերթը սահմանված է Մրցութային խորհրդի Որոշմամբ (http://www.parliament.am/Competition_Committee/11012024_MKH_VO_05.pdf):

Մրցույթին մասնակցելու համար փաստաթղթերը ԱԺ աշխատակազմ հանձնել առձեռն կամ ուղարկել փոստով (հասցե՝ ք. Երևան, 𝟎𝟎𝟗𝟓, Բաղրամյան 𝟏𝟗, Ազգային ժողով, Մրցութային խորհրդին):

Փաստաթղթերն ընդունման վերջնաժամկետն է 𝟐𝟎𝟐𝟒թ. փետրվարի 𝟓-ը ժամը 𝟏𝟖։𝟎𝟎-ն՝ ներառյալ։

Փոստով ուղարկված փաստաթղթերը համարվում են ժամկետում ներկայացված, եթե աշխատակազմը դրանք ստացել է մինչև սահմանված ժամկետի լրանալը:

Փոստով ուղարկված փաստաթղթերի ստացման վերաբերյալ հավակնորդը ծանուցվում է փաստաթղթերն ստանալուն հաջորդող մեկ օրվա ընթացքում՝ իր ներկայացրած էլեկտրոնային փոստի հասցեով:

Փաստաթղթերն առձեռն հանձնելու կամ մրցույթի վերաբերյալ լրացուցիչ տեղեկությունների համար դիմել Ազգային ժողովի աշխատակազմ՝ Հասմիկ Սողոմոնյան` (+𝟑𝟕𝟒 𝟏𝟏) 𝟓𝟏𝟑𝟐𝟓𝟐, (+𝟑𝟕𝟒 𝟗𝟏) 𝟒𝟕𝟏𝟎𝟒𝟖 հեռախոսահամարներով:

Հիշեցնենք, որ ԱԺ-ում նախորդ տարվա դեկտեմբերի 7-ին քննարկվում էր հանձնաժողովի անդամի ընտրության հարցը: Այդ օրը Հայկուհի Հարությունյանը չընտրվեց Կոռուպցիայի կանխարգելման հանձնաժողովի անդամի թափուր պաշտոնում:

Ավելի վաղ հայտնել էինք, որ Հայկուհի Հարությունյանի թեկնածությունը Կոռուպցիայի կանխարգելման հանձնաժողովի անդամի թափուր պաշտոնում առաջադրվել է մրցութային խորհրդի որոշմամբ: Հայկուհի Հարությունյանը 2019 թվականին նոյեմբերին ԱԺ-ի կողմից ընտրվել էր Կոռուպցիայի կանխարգելման հանձնաժողովի անդամի պաշտոնում, որից հետո հանձնաժողովի կողմից ընտրվել էր հանձնաժողովի նախագահի պաշտոնում, որը զբաղեցրել է մինչև պաշտոնավարման ժամկետի ավարտը՝ այս տարվա նոյեմբերի 19-ը: Հարությունյանն այս տարվա հոկտեմբերի 25-ին հայտ էր ներկայացրել Կոռուպցիայի կանխարգելման հանձնաժողովի թափուր դառնալիք պաշտոնը համալրելու նպատակով անցկացվող մրցույթին մասնակցելու համար, և նոյեմբերի 20-ին մրցութային խորհուրդը հաստատել էր նրա թեկնածությունը: