«Հայկական Կարիտաս» բարեգործական հիմնադրամը 2003 թվականից Գերմանիայի Բոնն քաղաքի Կարդինալ Ֆրինգզի անվան գիմնազիայի նախաձեռնությամբ ու հովանավորմամբ Շիրակի եւ Գեղարքունիքի մարզերի մի շարք գյուղական եւ քաղաքային դպրոցներում իրականացնում է ուսումնական պայմանների բարելավման ամենամյա ծրագիր (վերանորոգվել է 23 դպրոց), որը, սակայն, այս տարվա մայիսից դադարեցվել է: Գերմանական կողմը հրաժարվել է ֆինանսավորելուց եւ նույն ծրագրի շրջանակներում համագործակցություն է սկսել Հնդկաստանի հետ: Իսկ թե ինչու է կասեցվել մեծ արժողությամբ ծրագիրը, բացատրում են «Հայկական Կարիտաս»-ի ներկայացուցիչները:
Այս տարի ՀՀ ԿԳ նախարարությունը լուծարել է այս ծրագրի շրջանակներում լիարժեքորեն վերանորոգված Գյուղատնտեսական ակադեմիայի Ախուրյանի հենակետային վարժարանը եւ միացրել Նիկոլ Աղբալյանի անվան ավագ դպրոցին, իսկ հիմնանորոգված շենքը թողնվել է բախտի քմահաճույքին: Ահա թե ինչն է դրդել կազմակերպությանը դադարեցնել Հայաստանում բարեգործական ծրագրերի հովանավորությունը: «Հայկական Կարիտաս»-ի ներկայացուցիչների պնդմամբ` իրենք երկու տարի անընդմեջ նախարարությանը տեղյակ են պահել, որ հիշյալ վարժարանում գերմանական կողմի աջակցությամբ հիմնանորոգման աշխատանքներ են ընթանում: Մայիս ամսից սկսած` դոնոր կազմակերպությունը փորձեր է արել հանդիպել ԿԳ նախարարի հետ` պարզելու համար, թե ինչու նախօրոք հաշվի չի առնվել ֆինանսավորման հանգամանքը, սակայն նախարարությունից խուսափողական պատասխաններ են տվել: Համապատասխան նամակով դիմել են նաեւ վարչապետ Տիգրան Սարգսյանին եւ պատասխանի են սպասում:
«Եթե մի քանի նմանատիպ ծրագրեր փակվեն, մենք չգիտենք, թե ինչ վիճակում կհայտնվի մեր կազմակերպությունը: Չաշխատել էն կառույցների հետ, որոնք ժողովրդի շատ հոգսեր են հոգում, դա մեզ համար էլ է անհասկանալի»,-ասում է «Հայկական Կարիտաս»-ի գործադիր տնօրեն Անահիտ Մխոյանը:
Փաստի առաջ կանգնել է ոչ թե «Հայկական Կարիտաս»-ը, այլ կազմակերպության շատ այլ շահառուներ, որոնք սոցիալական այս ծանր պայմաններում աջակցության կարիք ունեն: «Ծրագրի գումարները հիմա ուղղվում են Հնդկաստան, քանի որ գերմանական կողմն ուղղակի հիասթափված է հայկական կողմի նման պահվածքից»,-շարունակում է ծրագրի համակարգողը: 2003թ-ից «Գերմանական բարեկամություն» ծրագրի շրջանակներում ծախսվել է 150 հազար եվրո: Նաեւ աջակցություն է ցուցաբերվել բազմաթիվ կարիքավոր ընտանիքների: «Կարիտաս»-ի ներկայացուցիչները մտավախություն ունեն, որ եթե հայկական կողմը համարժեք պատասխան չտա, դա էականորեն կազդի Հայաստանի վարկանիշի վրա, եւ միջազգային շատ այլ կազմակերպություններ ուղղակի կհրաժարվեն աշխատել Հայաստանի հետ եւ ներդրումներ իրականացնել: Եթե վարչապետից եւ նախարարությունից չլինի կոնկրետ պատասխան, «Կարիտաս»-ը նամակ կգրի նաեւ հանրապետության նախագահին:
Գյումրի
.gif)
