Հայաստանի հատուկ հանձնարարություններով նախկին դեսպան Էդմոն Մարուքյանը ուղիղ եթերում անդրադարձ է կատարել պաշտոնից հրաժարական տալու պատճառներին։
Մարուքյանը նշել է, որ հատուկ հանձնարարություններով դեսպան լինելու առաջարկը ստացել է այն ժամանակ, երբ եռում էր ռուս-ուկրաինական պատերազմն ու սկսվել էր հայ-ադրբեջանական բանակցային գործընթացը։
«Այդ ժամանակ գոյություն ունեին Հայաստանի Հանրապետության կողմից գծված կարմիր գծեր․ Լեռնային Ղարաբաղի ժողովրդի իրավունքների և անվտանգությա միջազգային մեխանիզմի ներքո երաշխավորումը, այսինքն՝ ՀՀ-ն և Ադրբեջանը ճանաչում են միմյանց։ Հայաստանը չի պահանջում Լեռնային Ղարաբաղի անկախությունը՝ փոխարենը միջազգային իրավունքի ներքո ստանում է հայերի անվտանգության երաշխավորությունը։ Այս մասին հայտարարությունը հնչում է Պրահայում՝ փաթեթի համաձայն, սակայն վերոնշյալ հայտարարությունից որոշ ժամանակ հետո Ադրբեջանը չի հայտարարում ՀՀ տարածքային ամբողջականությունը ճանաչելու մասին», – ասել է Մարուքյանը։
Նա անդրադարձել է սեպտեմբերի 19-ին Ադրբեջանի իրականացրած գործողություններին՝ նշելով, որ տեղի է ունցելե էթնիկ զտում, ինչը փլուզել է վերոնշյալ ծրագիրը։ Մարուքյանը մատնանշել է, որ էթնիկ զտման քաղաքականությունից հետո Ադրբեջանը չի մասնակցել ամերիկյան հարթակներում տեղի ունեցող գործընթացներին՝ միակողմանիորեն ԱՄՆ-ին գործընթացից դուրս հանելու պահանջ ներկայացնելով։
«Շատ դեպքերում այն մտայնությունը, որ մենք միակողմանիորեն բարի կամք կդրսևորենք, և Ադրբեջանը դա կգնահատի և ինքն էլ բարի կամք կդրսևորի՝ դա չի աշխատել, չի աշխատում և չի աշխատելու։ Այս օրերին Ստեփանակերտում քանդվում է Ազգային Ժողովի շենքը, այսինքն եթե Ադրբեջանը պլան ուներ, որ հայերը այնտեղ պիտի ապրեն, դա չպիտի արվեր, սակայն Հայաստանի Հանրապետությունը պաշտոնապես նման երևույթներին չի արձագանքում։», – շեշտել է Մարուքյանը՝ հավելելով, որ արցախահայության խնդիրը չի կարող լինել Ադրբեջանի ներքին գործը։
Մարուքյանը կարծում է, որ ՀՀ-ն պետք է դիմի Մարդու իրավունքների միջազգային դատարան՝ Ցեղասպանության կոնվենցիայի շրջանակներում՝ ընդդեմ Ադրբեջանի։
.gif)
