Հայտնի է դարձել Իսրայելի և ՀԱՄԱՍ-ի միջև հրադադարի շուրջ բանակցությունների վերսկսման ամսաթիվը

Իսրայելի իշխանությունները և պաղեստինյան ՀԱՄԱՍ շարժումը ծրագրում են կիրակի օրը վերսկսել Քաթարում պատանդների ազատ արձակման շուրջ բանակցությունները, հայտնում է Associated Press-ը։

Ըստ երկու եգիպտացի պաշտոնյաների, որոնցից մեկը ներգրավված է կողմերի միջև բանակցություններում, ՀԱՄԱՍ-ը միջնորդներին ներկայացրել է հրադադարի եռաստիճան ծրագրի նոր առաջարկ: Առաջին փուլը կլինի վեցշաբաթյա հրադադարը, որը կներառի 35 պատանդների ազատ արձակումը։ Դրանց թվում են Գազայի հատվածում պահվող կանայք, հիվանդները և տարեցները: Նրանք կփոխանակվեն Իսրայելի կողմից պահվող 350 պաղեստինցի գերիների հետ։

ՀԱՄԱՍ-ը նաև ազատ կարձակի առնվազն հինգ կին զինվորների՝ 50 բանտարկյալների դիմաց, հայտնում է Associated Press-ը: Նրանց թվում կլինեն ահաբեկչության մեղադրանքով երկարաժամկետ պատիժ կրողներ։ Եգիպտացի պաշտոնյաները նշել են, որ իսրայելական ուժերը ստիպված կլինեն «հեռանալ Գազայի հատվածի երկու հիմնական ճանապարհներից»՝ թույլ տալով տեղահանված պաղեստինցիներին վերադառնալ անկլավի հյուսիս և թույլատրել մարդասիրական օգնության ազատ մուտքը:

Երկրորդ փուլում երկու կողմերն էլ պետք է մշտական ​​հրադադար հայտարարեն, ընդ որում՝ ՀԱՄԱՍ-ը նոր գերիների դիմաց ազատ կարձակի պատանդ մնացած իսրայելցի զինվորներին: Երրորդ փուլում ՀԱՄԱՍ-ը կհանձնի իր մոտ գտնվող մարմինները՝ Իսրայելի կողմից Գազայի շրջափակումը վերացնելու և անկլավի վերականգնման համար պայմաններ ստեղծելու դիմաց։