Քաղաքագետ Սուրեն Սուրենյանցն ինչպես միշտ հերքում է իր կողմից արված սկանդալային հայտարարությունները: Ներկայացնում ենք քաղաքագետի հետ Armlur.am-ի հարցազրույցը:
–Պարոն Սուրենյանց, Դուք ասում էիք, որ Սամվել Ալեքսանյանը Ձեզ գնել էր և օգտագործել Փակ շուկայի թեման հարթեցնելու համար, սակայն 5000 $ գումար չի տվել: Կասե՞ք ` ինչքա՞ն գումարի դիմաց պատրաստ կլինեք նման այլ ծառայություն մատուցել, որպեսզի հետո դժգոհություններ չունենաք: Ո՞րն է Ձեր գինը:
-Իսկ ո՞վ ասաց, որ չի տվել կամ ո՞վ ա ասում, որ բողոքի համար ա տվել: Ես ափսոսանք եմ հայտնել իմ արածի համար, և դա արել եմ էմոցիաների և ասեկոսեների ազդեցության համատեքստում:
–Ասում են, որ դժվարն առաջին անգամն է. եթե մարդ մի անգամ վաճառվում է, ուրեմն նա դա կարող է անել մի քանի անգամ: Սամվել Ալեքսանյանը Ձեր ծառայություններից օգտված ո՞րերորդ հաճախորդն էր:
-Ուրեմն ` իմացեք, որ ես պարոն Ալեքսանյանի հետ որևէ խնդիր չունեմ: Ու հիմա ձեզ երեք բան կասեմ. առաջինը ` ես սխալ եմ արել մարդկային առումով, որ մտել եմ պարոն Ալեքսանյանի և քավոր Հակոբի հարաբերությունների դաշտ: Ու ես մարդկային առումով ինձ շատ վատ եմ զգում դրա համար: Իրանք երկուսն էլ շատ հարգված մարդիկ են, ու երկուսին էլ ես շատ հարգում եմ:
Երկրորդը ` Փակ շուկայի մասին ինֆորմացիան, որ իբրև թե վաճառողները խաբված են, ես արել եմ ասեկոսեների վրա և շատ վատ եմ զգում, որ որպես պրոֆեսիոնալ ժուռնալիստ չեմ փորձել ճշտել դա հրապարակելուց առաջ: Ես երեկ և այսօր եղել եմ Փակ շուկայում. գյուղատնտեսական շուկան պահպանված ա, հետևաբար էտ հարցում իմ պնդումը սխալ ինֆորմացիայի հետևանք ա էղել:
Երրորդը ` ինչ վերաբերում էր երկրապահին և Եռաբլուրին ` ամենայն հավանականության ես պնդում էի արել, որ իբրև թե Սամվել Ալեքսանյանը դարձել է ԵԿՄ վարչության անդամ, որպեսզի վարչությունում ինչ-ինչ խնդիրներ լուծի, ես նման պնդում էի արել Երկրապահի համագումարի շուրջ առաջացած շահարկումների վրա: Այդ շահարկումները որոշակի ձևով իմ վրա ազդել են, և ես հիմա վստահ ասում եմ, որ պարոն Ալեքսանյանն այն բացառիկ գործարարներից է, որ օգնել է ազատամարտիկների ընտանիքներին և բոլոր իրավունքներն ունի ԵԿՄ վարչության անդամը լինելու: Այսքան բաները հաշվի առնելով ` ես ֆեյսբուքյան իմ գրառման համար ևս հայցում եմ հասարակության, նաև պարոն Ալեքսանյանի ներողամտությունը:
-Իսկ հնարավո՞ր է ` Դուք ուրիշից եք գումար վերցրել, որպեսզի դեմ դուրս գաք Ալեքսանյանին:
-Ո՛չ: Ես բազմիցս ասել եմ, որ պարոն Ալեքսանյանն ինձ միշտ էլ տարբեր հարցերով օժանդակել ա, և նման խնդիր, որ ես ինչ որ մեկից գումար վերցնեի Սամվել Ալեքսանյանի դեմ խոսելու համար, բացառված ա:
-Իսկ Մաշտոցի պուրակում կայացած այծիկների և ավանակների ակցիան Ձե՞ր խորհրդով էր: Այն օրերին Դուք ավանակների և այծիկների կողմանկիցն էիք:
–Ես ավանակների ու այծիկների կողմանկիցը երբեք չեմ եղել. էտ դեղիններն էին արել: Ու դա իմ խորհրդով չէր եղել:
-Պարոն Սուրենյանց, Դուք մշտապես ֆինանսական խնդիրներ եք ունենում և բազմաթիվ մարդկանց մեծ քանակությամբ գումար եք պարտք: Ինչու՞:
-Սխալ լուրեր են պտտվում: Ես հերքում եմ էտ լուրերը: Աբսալյուտնա նման խնդիր չկա: Ես ոչ մեկին գումար պարտք չեմ:
Տաթև Հարությունյան
.gif)
