Հայաստանի հավաքականն անկանխատեսելի է և թույլ չէ․ Չեխիայի հավաքականի գլխավոր մարզիչ

Չեխիայի հավաքականի գլխավոր մարզիչ Իվան Հաշեկը կարծիք է հայտնել Հայաստանի հավաքականի մասին: Ազգային թիմերը այսօր ընկերական հանդիպում կանցկացնեն Պրահայում:

«Հայաստանի հավաքականն անկանխատեսելի է, և հաստատ թույլ չէ: Երբ Ուելսում հաղթում ես 4-2 հաշվով, ուրեմն որակյալ թիմ ես: Հայերի կազմում կան ֆուտբոլիստներ, որոնք որակյալ առաջնություններում են խաղում, ինչպես նաև թիմում կան փորձառու խաղացողներ:

Գնդակով նրանք շատ արագ են անցնում գրոհի: Այո, եթե նայենք նրանց արդյունքներին, ապա շատ գոլ չեն խփում, բայց նրանց պաշտպանությունը ճեղքելն էլ հեշտ չէ: Մենք քաջատեղյակ ենք նրանց ունակությունների մասին:

Մենք ասպարեզ ենք դուրս բերելու երիտասարդ շատ ֆուտբոլիստների, այդ պատճառով մեզ անհրաժեշտ է երկրպագուների աջակցությունը: Վստահ եմ` երկրպագուները կօգնեն հաղթել այս խաղում»,- Հաշեկի խոսքերը մեջբերում է fotbal.cz-ն:

Չեխիա – Հայաստան հանդիպումը կկայանա Պրահայի «Լետնա» ստադիոնում, կմեկնարկի Հայաստանի ժամանակով 23:00-ին։