«Չորս ուժերի ղեկավարների հանդիպումը իրար հետ մինչև հիմա չի եղել, որը կարող էր անհարթություններ շտկել: Այս պահին համագործակցությունն ընթանում է միայն խորհրդարանի մակարդակով»,- այսօրվա մամլո ասուլիսում ասաց «Ժառանգություն» կուսակցության առաջնորդ Րաֆֆի Հովհաննիսյանը:
«Ժառանգության» ղեկավարը հույս ունի, որ չորս ուժերի ղեկավարները միասին կհանդիպեն, սակայն բացի այդ ուժերից՝ նրա համար ցանկալի է նաև քաղաքացիական նախաձեռնությունների և քաղաքական այլ ուժերի համագործակցությունը:
«Ինձ բնավ պետք չէ վարկանիշ, աթոռ, ուզում եմ տեսնել իրավական Հայաստան, որտեղ նորմալ ընտրություններ են ընթանում, որտեղ կարելի է ընտրություններով իշխանություն փոխել»,- հայտարարեց Րաֆֆի Հովհաննիսյանը:
Նախագահի նախկին թեկնածուի խոսքով` ցայսօր ինքը չի հանդիպել ՀՅԴ-ի և ՀԱԿ-ի ղեկավարների հետ, չնայած հայտնել է պատրաստակամություն: «Չորսի ձևաչափը դեռևս չկա»,- ասաց նա` հավելելով, որ ինքը արագացված գործողությունների կողմնակից է:
Րաֆֆի Հովհաննիսյանը հայտարարեց, որ «Ժառանգությունը» վաղը կմասնակցի «Դեմ եմ» շարժման ակցիային, իսկ մարտի 28-ին՝ ժամը 17:30-ին, «Ժառանգությունը հրավիրում է հանրահավաքի:
.gif)
