ՏԵՍԱՆՅՈՒԹ․ «Ինքն արել է, ինքն էլ թող քաշի, ես դիմումս հետ չեմ վերցնելու». Հակոբ Ասլանյանը՝ իր հետ վիճած քաղաքացուն կալանավորելու մասին

Այսօր հայտնի դարձավ, որ հանրային տրանսպորտում ՔՊ խմբակցության պատգամավոր Հակոբ Ասլանյանին վիրավորած, այնուհետև դաժան ծեծի ենթարկված Սամվել Վարդանյանի մեղադրանքը լրացվել է: Քրեական գործը սկզբում նախաձեռնված է եղել առերևույթ խուլիգանության հատկանիշներով, հետո լրացվել է քաղաքական հիմքով թշնամանք, անհանդուրժողականություն հրահրելու հոդվածով։

Այս մասին հայտնել էր նրա պաշտպան Ռուբեն Մելիքյանը՝ հավելելով, որ տվյալ հոդվածով նախատեսվում է 1-4 տարի ազատազրկում։

ArmLur.am-ը ՔՊ-ական պատգամավորից հետաքրքրվեց՝ հաշվի առնելով մի շարք հանգամանքներ՝ քաղաքացու տարիքը, բացի դա՝ որ այսօր դատարանի դիմաց Սամվել Վարդանյանի մայրը ուշագնաց էր եղել, հնարավո՞ր է մտափոխվի ու դիմումը հետ վերցնի:

ՔՊ-ական պատգամավորը, սակայն, անդրդրվելի է.

«Ո՛չ, ես դիմումը երբեք հետ չեմ վերցնելու, դա կտրականապես եմ որոշել, որովհետև ինքը պետք է պատժվի հենց նրա համար, որ վերցրել ու տեսանյութը հրապարակել է ֆեյսբուքում: Եթե չհրապարակեր տեսանյութը, այսքան մեծ պատմություն չէր լինի, ինքն արել է, ինքն էլ թող քաշի: Երևի ցանկացել է իր տերերի մոտ հերոս երևալ, թե տեսեք՝ ինչ տոնով եմ խոսում, ինչպես եմ տրորում պատգամավորին. դուք էլ հելեք, այդպես արեք»,-ասաց Ասլանյանը:

Հարցին՝ այսինքն ինքը ոչ այնքան իր հասցեին արված արտահայտությունից է վիրավորվել, այլ նրանից, որ տեսանյութը համացանցում է հրապարակվել՝ պատգամավորն ասաց՝

«Եւ՛ վիրավորանքն է, եւ տեսանյութը հրապարակելը, այստեղ քաղաքական ուրիշ մոտեցում էլ կա, երիտասարդը ցանկացել է ֆեյսբուքի միջոցով ցույց տալ, թե ինքը կարող է պատգամավորին վիրավորել ու անպատիժ մնալ, այսինքն՝ ինքը ձեռք է բարձրացրել պետության վրա, ոչ միայն պատգամավոր Հակոբ Ասլանյանի վրա»,-ասաց պատգամավորը: