Այդ ի՞նչ խնդիրներ են արցախցիների համար լուծել, որ դրանից ժողովրդավարությունը տուժել է. Մետաքսե Հակոբյանը՝ Հասմիկ Հակոբյանի հայտարարությունների մասին

ԱԺ ՔՊ խմբակցության պատգամավոր Հասմիկ Հակոբյանն օրերս իր հարցազրույցներից մեկում, անդրադառնալով «Ֆրիդոմ հաուսի» զեկույցում արձանագրված ժողովրդավարական հետընթացին, դա կապել է Արցախից տեղահանվածների խնդիրների հետ՝ ասելով, որ պետական իշխանության մարմինները զբաղված էին տեղահանվածների հարցերով ու դանդաղել են ժողովրդավարություն զարգացնելու հարցում։

ArmLur.am-ի հետ զրույցում Արցախի ԱԺ պատգամավոր Մետաքսե Հակոբյանը, արձագանքելով Հասմիկ Հակոբյանի հայտարարություններին, նկատում է` մինչ 2018թ-ը Արցախը ոչ մի խնդիր չուներ, Հայաստանը՝ առավել ևս, 2020թ-ից հետո՝ իշխանությունների վարած քաղաքականության ադյունքում Արցախը կորավ խնդիրների մեջ.

«Հենց այս իշխանությունների ձեռքով Արցախը հանձնվեց, իրենց նախաձեռնությամբ մենք տեղահանվեցինք մեր հայրենիքից, մեր տներից և հայտնվեցինք հայրենիքի մյուս հատվածում: Այսինքն՝ այս բոլոր խնդիրներն իրենք ստեղծեցին, էլ չեմ ասում, որ Արցախում այլևս չկա ընտանիք, որը զոհ չունենա և վերքերը դեռ թարմ ենք»,-նշում է Մետաքսե Հակոբյանը:

Նրա խոսքով՝ իշխանություններն այն բոլոր խնդրները, որոնք կան Հայաստանում փորձում են բարդել արցախցիների վրա.

«Սա իրենց օրակարգն է, որը բերել են 2018թ-ի իշխանազավթումից հետո, այսինքն՝ այն գլխից խնդիրների մեղավոր էին կարգել Արցախն ու արցախցիներին, հիմա էլ շարունակում են նույն քաղաքականությունը: Եթե այսօր ՀՀ քաղաքացուն ոստիկանական բաժնում ստորացնում են և դա հանրայնացվում է, և իրենք նորից արդարանում են ու մեղքը բարդում են արցախցիների վրա, ի՞նչ կապ ունեն արցախցիները իրենց ագրեսիվ ու ոչ ժողովրդավարական պետության հետ, որևէ կապ չեն կարող ունենալ: Ի՞նչ խնդիրներ են արցախցիների համար լուծել, որը շեղել է իրենց ուշադրությունը ՀՀ խնդիրներից կամ դրանից ժողովրդավարությունը տուժել է, որևէ խնդիր իրենք լուծո՞ւմ են արցախցիների համար: Մեր գլխավոր նպատակը Արցախ վերադարձն է, որը հիստերիա է առաջացրել իշխանությունների մոտ, բայց իրենք որևէ հարց չեն լուծում»,-ասում է Մետաքսե Հակոբյանը:

Քրիստինա Մուշեղյան