ԱՄՆ նախագահ Ջո Բայդենն ուղերձ է հղել Հայոց ցեղասպանության զոհերի հիշատակի օրվա կապակցությամբ: Սպիտակ տան տարածած հաղորդագրության համաձայն՝ ուղերձում ասված է.
«Այսօր մենք կանգ ենք առնում՝ հիշելու Մեծ եղեռնի՝ Հայոց ցեղասպանության ժամանակ կորսված կյանքերն ու վերահաստատում ենք երբեք չմոռանալու մեր խոստումը:
Դաժանության արշավը սկսվեց 1915 թվականի ապրիլի 24-ին, երբ օսմանյան իշխանությունները Կոստանդնուպոլսում ձերբակալեցին հայ մտավորականներին և համայնքի ղեկավարներին։ Հետագա օրերին, ամիսներին և տարիներին մեկուկես միլիոն հայ տեղահանվեց, սպանվեց կամ շարքով ուղարկվեց մահվան՝ ընտանիքներն ընդմիշտ թողնելով կոտրված, սերունդները՝ փոխված:
Սգալով այս ողբերգությունը՝ մենք գնահատում ենք նաև հայ ժողովրդի տոկունությունը։ Մարդկության պատմության ամենամութ էջերից մեկը վերապրածներն սկսեցին ավելի լավ ապագա կառուցել մեր աշխարհի համար: Ցուցաբերելով խիզախություն և նպատակասլացություն՝ նրանք վերականգնեցին իրենց կյանքը, պահպանեցին իրենց մշակույթը, պետությունների ազգերի կառուցվածքն ամբողջ աշխարհում, ներառյալ մեր սեփականը: Նրանք պատմում էին իրենց պատմությունները՝ երաշխավորելու, որ 109 տարի առաջ այս օրը սկսված զանգվածային վայրագություններն այլևս երբեք չեն կրկնվի։
Մեր հանդիսավոր երդումն է. այսօր և ամեն օր Միացյալ Նահանգները կշարունակի պաշտպանել մարդու իրավունքները և հանդես գալ անհանդուրժողականության դեմ: Մենք կշարունակենք ատելությանն ու սարսափին դիմակայել հույսով և ապաքինմամբ: Կշարունակենք կանգնել բոլոր նրանց կողքին, ովքեր փնտրում են ապագա, որտեղ բոլորը կարող են ապրել արժանապատվությամբ, անվտանգ և հարգանքով»:
.gif)
