Ապրիլի 24-ին Հայոց ցեղասպանության 109-րդ տարելիցի կապակցությամբ Վալ-դը-Մարն դեպարտամենտի Կրետեյ քաղաքում՝ Ֆրանսիայի համար նահատակված հերոսների հիշատակը հավերժացնող հուշարձանի մոտ, դեպարտամենտային մակարդակով տեղի ունեցավ ոգեկոչման հանդիսավոր արարողություն՝ Վալ-դը-Մարնի պրեֆեի տեղակալ Էմանուել Դյուպյուիի, Կրետեյի քաղաքապետ Լորան Կատալայի, ՀՀ դեսպանության առաջին քարտուղար Գայանե Մանուկյանի, Վալ-դե-Մարն դեպարտամենտի խորհրդի փոխնախագահ Ժան-Դանիել Ամսլերի, «Վալ-դը-Մարնի ֆրանս-հայկական ալյանս» կազմակերպության նախագահ Դելֆին Կույումջյանի, ռեգիոնալ, դեպարտամենտային և քաղաքային իշխանությունների ներկայացուցիչների, ֆրանսահայ համայնքի ու հոգևոր դասի ներկայացուցիչների մասնակցությամբ, ովքեր ծաղկեպսակներ զետեղեցին հուշարձանի առջև։
Ծաղկեպսակներ զետեղվեցին նաև միջոցառմանը ներկա Ալֆորվիլի քաղաքապետ Լյուկ Կարվունասի, ֆրանսիացի խորհրդարանականների ու փոխքաղաքապետերի կողմից, ինչպես նաև Ֆրանսիայի Իլ-դը-Ֆրանս ռեգիոնի նախագահ Վալերի Պեկրեսի և Վալ-դը-Մարն դեպարտամենտի խորհրդի նախագահ Օլիվյե Կապիտանիոյի անունից:
Միջոցառմանը երաժշտական կատարումներով հանդես եկան Վալ-դը-Մարն դեպարտամենտի Ալֆորվիլ քաղաքում գտնվող Սուրբ Մեսրոպ Արաբյան դպրոցի աշակերտները:
.gif)
