Նևադայի նահանգային մարզական հանձնաժողովը տուգանել է Արման Ծառուկյանին՝ ապրիլի 14-ին Լաս Վեգասում կայացած UFC 300 մրցաշարում բրազիլացի Չարլզ Օլիվեյրայի դեմ մենամարտից առաջ երկրպագուին հարվածելու համար:
UFC-ի թեթև քաշային կարգում հանդես եկող հայ մարտիկը տուգանվել է 31.600 դոլարով: Ծառուկյանն օկտագոն գնալու ճանապարհին հարվածել էր երկրպագուներից մեկին, որը միջնամատ էր ցույց տվել նրան:
Հիշեցնենք, որ հայ մարտիկը թեթև քաշային կարգի նախկին չեմպիոնին հաղթել էր միավորների առավելությամբ և ստացել 300 հազար դոլարից ավելի հոնորար:
Այս հաղթանակից հետո 27-ամյա Ծառուկյանը դարձել է UFC-ի թեթև քաշային կարգի դասակարգման առաջատարը: UFC-ում Հայաստանի ներկայացուցիչը տարել է 9 հաղթանակ, պարտվել 2 անգամ։ Ընդհանուր առմամբ՝ Արմանն օկտագոնում անցկացրել է 25 մենամարտ, տարել 22 հաղթանակ, պարտվել 3 դիմակայությունում:
.gif)
