Քաղաքական իշխանության ներգրավվածության պայմաններում դժվար էր ակնկալել ավելի մեղմ խափանման միջոց. Ռուբեն Մելիքյանը՝ Սամվել Վարդանյանի տնային կալանքի մասին

«Քաղաքացիական պայմանագիր» խմբակցության պատգամավոր Հակոբ Ասլանյանի դեպքով ձերբակալված Սամվել Վարդանյանը այժմ տնային կալանքի մեջ է։ Այս մասին այսօր ArmLur.am-ին հայտնեց փաստաբան Ռուբեն Մելիքյանը:

Հիշեցնենք, որ դատարանը Վարդանյանի նկատմամբ 7 մլն դրամ գրավ և տնային կալանք էր կիրառել:

Սամվել Վարդանյանը հայտնել էր ոստիկանների ուղեկցությամբ ձերբակալվածների պահման վայր տեղափոխելիս ապրիլի 15-ի գիշերը իր նկատմամբ իրականացված բռնության մասին:

ArmLur.am-ը այս թեմայով կապ հաստատեց փաստաբան Ռուբեն Մելիքյանի հետ, ով ներկայացրեց ներկա պահին գործի ընթացքի մասին:

«Վատն այն է, որ ոչ մի նորություն չկա: Վերջին տեխնիկական նորությունն այն է, որ մենք 2 օր առաջ ստացել ենք դատաբժշկական փորձագետի եզրակացությունը Սամվել Վարդանյանի ստացած վնասվածքների մասով: Տեղեկություն չունենք՝ արդյո՞ք հարցաքննվել են ուղեկցող 2 ոստիկանները: Առանձնապես ծանր հանցագործության վերաբերյալ քրեական վարույթ է քննվում: Պնդումն առաջին հերթին այն է, որ այս գործը ունի կարևորագույն առանձնահատկություն՝ խոսքը վերաբերվում է առերևույթ քաղաքական իշխանության կողմից պատվիրվածի մասին, իսկ այս պայմաններում լավատեսություն լինել չի կարող»:

Գրավի մասին Ռուբեն Մելիքյանն ասաց, որ գումարը հավաքվել է, սահմանված ժամկետում վճարվել է ու այդ հարցը փակվել է։ Խափանման 2 այլընտրանքային միջոցներն էլ այս պահին կիրառման մեջ են գտնվում, Սամվել Վարդանյանը իրենց տանն է՝ տնից դուրս գալու իրավունք չունի, հաղորդակցվելու իրավունք չունի, իսկ գրավը վճարված է քաղաքացիների օգնությամբ:

«Դատարանը որոշեց, որ Սամվել Վարդանյանի պարագայում բավարար է, որ կիրառվի տնային կալանքը՝ գումարած գրավը: Եթե Սամվել Վարդանյանը, օրինակ հիմա տնային կալանքի պայմանները խախտի, ապա պետությունը իրավունք կունենա բարձրացնել գրավը: Մենք չենք համարում, որ այս պայմանները մաքուր իրավունքի տեսանկյունից մեզ բավարարում են, բայց իրատեսական առումով՝ քաղաքական իշխանության ներգրավվածության պայմաններում դժվար էր ակնկալել ավելի մեղմ խափանման միջոց, քան սա: Մոտ 20 օր է կիրառվում է տնային կալանքը, աչալուրջ հսկողություն է իրականացվում, Սամվել Վարդանյանն էլ բնականաբար գիտակցում է, որ չպետք է սահմանափակումների խախտմանը մոտ գործողություններ կատարի: Տանից դուրս չի գալիս և չի էլ պատրաստվում գալ:

Ինչպես ցանկացածը, այնպես էլ Սամվել Վարդանյանը, հնարավոր է, որ մի օր արթնանա և իրեն ծանուցագիր գա՝ որևէ կարգավիճակով ինչ-որ վարույթի ներկա լինելու մասին: Բայց այս պահին չեմ տեսնում այդ առումով որևէ բան»:

Իռեն Գեդեոնյան