Եգիպտոսը միանում է ՄԱԿ-ի դատարան ուղղված Հարավաֆրիկյան Հանրապետության հայցին՝ ընդդեմ Իսրայելի

Եգիպտոսը որոշել է միանալ Արդարադատության միջազգային դատարանում Իսրայելի դեմ Հարավաֆրիկյան Հանրապետության հայցին։ Այս մասին մայիսի 12-ին հայտնել է Եգիպտոսի ԱԳՆ-ն X սոցիալական ցանցի իր էջում։

«Եգիպտոսի Արաբական Հանրապետությունը հայտարարում է իր մտադրության մասին պաշտոնապես մասնակցելու Հարավաֆրիկյան Հանրապետության կողմից Իսրայելի դեմ Արդարադատության միջազգային դատարան ներկայացված գործին», – ասվում է հայտարարության մեջ:

Եգիպտոսը նաև մեղադրում է Իսրայելին «քաղաքացիների վրա համակարգված հարձակումներ իրականացնելու, ենթակառուցվածքները ոչնչացնելու և պաղեստինցիներին ստիպելու համար լքել իրենց հողերը՝ հանգեցնելով աննախադեպ հումանիտար աղետի, որն անտանելի է դարձրել կյանքը Գազայի հատվածում»։

Հարավային Աֆրիկան ​​դիմել է Հաագայի Արդարադատության միջազգային դատարան 2023 թվականի դեկտեմբերի 29-ին։ Հայցվորը պահանջում է վճիռ կայացնել այն մասին, որ Իսրայելը խախտել է 1948 թվականի Ցեղասպանության կոնվենցիայով ստանձնած իր պարտավորությունները Գազայի հատվածում իր գործողություններով:

Հարավային Աֆրիկայի հայցի վերաբերյալ լսումները տեղի են ունեցել հունվարի 11-12-ին: Ըստ աֆրիկյան երկրի՝ Իսրայելի քայլերը ցեղասպանական են, քանի որ դրանք իրականացվում են՝ նպատակ ունենալով «ոչնչացնել Գազայի հատվածում պաղեստինցիներին՝ որպես պաղեստինյան ավելի լայն ազգային, ռասայական և էթնիկ խմբի մաս»։

Իրավիճակը Մերձավոր Արևելքում սրվեց 2023 թվականի հոկտեմբերի 7-ի առավոտյան, երբ պաղեստինյան արմատական ​​ՀԱՄԱՍ շարժումը Իսրայելին ենթարկեց զանգվածային հրթիռակոծության Գազայի հատվածից, ինչպես նաև ներխուժեց երկրի հարավային սահմանային շրջաններ և պատանդներ վերցրեց։ Նույն օրը Իսրայելը սկսեց հակահարված տալ։