Չի բացառվում` հանրահավաք չորս ուժերի կողմից

Armlur.am լրատվականի թղթակիցը  ՀԱԿ խմբակցության ղեկավար Լևոն Զուրաբյանից հետաքրքրվեց `  հնարավոր է ապրիլի 28-ից առաջ ԱԺ չորս ոչ իշխանական ուժերը միասնական հանրահավաք անեն Ազատության հրապարակում:

Լևոն Զուրաբյանի խոսքով ` քննարկումներ տեղի են ունենում այդ ուղղությամբ, ոչ մի բան  բացառել  չի կարելի: «ՀԱԿ-ը կողմնակից է, որ նման հանրահավաք իրականացվի»,- ասաց  Լևոն Զուրաբյանը:

-Հանրահավաքի կազմակերպման նպատակը որ՞ն է լինելու: Ժողովրդի տրամադրվածությու՞նն եք ստուգելու:

-Ստուգելու  կարիք չկա: Մարտի մեկի մեր հանրահավաքը կայացած ստուգատես է: Մենք գիտենք, որ ժողովուրդը պատրաստ է պայքարի: Եթե հիմա 4 քաղաքական ուժերը սկսեն իշխանափոխության գործընթաց, այն հաջողություն կունենա:

-Եթե ժողովրդի տրամադրությունը չի ստուգվելու հանրահավաքով, այդ դեպքում որն է  հանրահավաքի կազմակերպման նպատակը:

-Բա  հաղթանակը ո՞նց ենք ձեռք բերելու: Հենց հանրահավաքային ճնշմամբ:

-Այսինքն `  հանրահավաք եք անելու, որ հետո ԱԺ-ում  կառավարությանն անվստահություն հայտնե՞ք:

-Դուք ուզում եք `  քայլերի հաջորդականությունն իմանալ,  քաղաքական խոհանոցային նրբությունների մեջ մտնել, իսկ ես այդ հաճույքը ձեզ պատճառել չեմ կարող:

Սոնա Դավթյան