«Ինձ Տիգրան Կարապետիչի հետ չասոցացնեք». Արկադի Կիրակոսյան

«Հզոր ապագա»  կուսակցության  ղեկավար Արկադի Կիրակոսյանի մամլո ասուլիսին  ներկա էր միայն armlur.am լրատվականը: Զրույցի ժամանակ կուսակցության ղեկավարը պատմեց, որ փորձել է մարդկանց համոզել  ներդրումներ անել Հայաստանում:

Մեր կուսակցության նպատակն է յուրաքանչյուր մարզում բացել ամբուլատոր բուժման հաստատություն ` դնել հետազոտման ձայնաախտորոշիչ  համակարգ, որը մարդկանց անվճար կսպասարկի, ինչպես նաև սփյուռքի ներուժն ավելի մեծ թափով օգտագործել, աշխատատեղեր բացել:

Փորձեցինք Արկադի Կիրակոսյանից պարզել` ինչ խնդիրներ է դրել կուսակցությունն իր առաջ և  քաղաքական որ  թևում է իրեն տեսնում:

-Պրն Կիրակոսյան, Դուք որպես արտախորհրդարանական ուժի ներկայացուցիչ, կհամագործակցե՞ք  ԱԺ չորս ոչ իշխանական ուժերի հետ, որոնք այս պահին  քաղաքական կոնսուլտացիաներ են վարում:

-Ոչ իշխանական ուժերը ժամանակին իշխանություն են եղել, բացի «Ժառանգությունից» հետևաբար  խոսել ոչ իշխանական ուժերի մասին, աբսուրդ է:  Այդ ուժերը ժամանակին ունեցել են  իշխանություն, ի՞նչ են  արել: Ես ինձ տեսնում են այնտեղ, որտեղ իրական ծրագրեր են, ռեալ քայլեր, ոչ թե  երկպառակության փորձեր:

-Որտե՞ղ եք տեսնում երկպառակություն:

-Երկպառակություն տեսնում են այնտեղ, որ եթե ԱԺ չորս  ոչ իշխանական ուժերը չկարողացան միասին ձևավորել իրենց պլատֆորմը, արդեն կար երկպառակտում:

-Այդ դեպքում ձեզ ո՞ր քաղաքական ուժերի կազմում եք տեսնում: Միգո՞ւցե իշխող կուսակցության կողքին:

-Ոչ, իշխող կուսակցության կազմում եմ տեսնում, ոչ էլ ընդդիմության կողքին, այս պահին ես կենտրոնամետ եմ: Խնդրում եմ ինձ Տիգրան Կարապետիչի հետ չասոցացնել: Մենք իրական կենտրոնամետ ուժ ենք, որտեղ կանգնած են քաղաքական լուրջ ուժերը: Մեր գերխնդիրն այն է, որ մարդկանց ոչ թե խոսոտւմներ տալ, այլ ռեալ գործեր կատարել: Մի աշխատատեղի ձեռքբերումն անգամ մենք կհամարենք ձեռքբերում:

–Քանի՞ անդամ ունի կուսակցությունը:

-2000:

-Հայտնի է, որ  կուսակցություն պահել միայն անդամավճարներով հնարավոր չէ:Ֆինանսական այլ  միջոցներ որտեղի՞ց եք գտնում և ո՞վ է ձեզ հովանավորում:

– Ինձ ոչ ոք չի հովանավորում, ես ունեմ  բավարար միջոցներ իմ ընտանիքն ապահովված է ամեն ինչով:

-Այսինքն `  բիզնեսո՞վ եք զբաղվում:

-Այո, դրսում ` Ռուսաստանում,  բայց մեր ընտանիքն է զբաղվում  բիզնեսով:

-Ի՞նչ բիզնես գործունեություն է ծավալում ձեր ընտանիքը:

-Արտադրության ծավալներ ունենք, առևտրային կենտրոններ…

– Եթե ձեր ընտանիքը զբաղվում է բիզնեսով, ձեր ընտանիքն էլ ապահովված է ամեն ինչով,  ինչո՞ւ եք ստեղծում կուսակցություն:

-Կուսակցություն բացելն ինքնանպատակ չէ, ոչ էլ բիզնես առարկա: Եթե մենք կարողանանք իրականացնել մեր քաղաքական ծրագրերը, շատ լավ, եթե ոչ ` ոչ:

-Ներկայումս   փոքր կուսակցությունների ՝  մեծերի մեջ  միավորվելու գործընթաց է գնում: Ձեր կուսակցությանը նման ճակատագիր սպասվո՞ւմ է:

-Ոչ, մենք ավելի  շատ  կինքնալուծարվենք, քան որևէ մեկի կազմում կմտնենք:

Քանի  տարի է, որ ստեղծվել է կուսակցությունը:

-4 տարի:

-Բայց 4 տարի է, ինչ ձեր կուսակցությունը բավական պասիվ է:        

-Ընդունում եմ: Նախ ես էստեղ 2 տարի չեմ եղել, 2-րդ `  կուսակցության մեջ առաջացան ներկուսակցական տարաձայնություններ: Մինչև սեպտեմբեր ամիսը կլինի մեծ համագումար համալիրում, այդ ժամանակ հանրությունն ավելի լավ կտեղեկանա:

-Դուք Հայաստանում 2 տարի չեք եղել, բայց կուսակցությունն ունեցել է  փոխնախագահներ՝  կարող էին  նրանք ակտիվ  լինել:

-Բայց  եթե մեր քաղաքական կուրսը հստակ  չէ: Մենք էլ ունեցանք  ձախողումներ, երկպառակություններ, որն էլ թուլացրեց կուսակցությանը: Մենք չենք եկել քարկոծելու, միանալու, մենք եկել ենք մեր գործն անելու:

–Եթե կենտրոնամետ ուժ եք, բանակցելու եք բոլորի, անգամ ՀՀԿ-ի հե՞տ:

-Այո, անգամ ՀԱԿ-ի հետ, բոլորի ուժերի հետ:

-Դե հիմա չորս քաղաքական ուժ համագործակցում են  միմյանց հետ, ձեզ ի՞նչն է խանգարում դառնալ 5-րդը:

-Հեռանկար չեմ տեսնում, որովհետև ռեալ գործ չկա:

-Որովհետև դեռ   բանակցում են:

-Բանակցում են ` միանալով «Դեմ եմ» շարժմանը, որը դարձել  է քաղաքական 4  ուժերի շարժում:

-Այսինքն `  «Դեմ եմ»  նախաձեռնությունը քաղաքական շարժում եք համարո՞ւմ:  

-Այո:

– Ընդհանուր առմամբ գո՞հ եք իշխող կուսակցության վարած քաղաքականությունից:

-Բացթողումներ շատ կան, կարող էին արվել քայլեր, որոնք չեն արվել:  Չեմ կարող ասել, որ գոհ եմ: Բայց մենք շատ բաներից դժգոհ ենք ՝ օրինակ ստեղծված իրավիճակից, սոցիալական բեռից:

–Երկրում ստեղծված իրավիճակի համար պատասխանատու է  ՀՀ կառավարությունը, որին անվստահություն են հայտնելու 4 քաղաքական ուժերը ապրիլին…

-Ես նրանց կհասկանամ այն դեպքում, երբ ռեալ կներկայացնեն ` ով է  իրենց վարչապետի թեկնածուն և նախարարները:  Ինձ ծրագիրն ու դրա կատարման մեխանիզմներ են հետաքրքիր:

-Իսկ արտախորհրդարանական ուժերից ու՞մ հետ եք համագործակցելու:

Եթե լինի հստակ գաղափարախոսություն,  հստալ մեխանիզմներ, պատրաստ ենք համագործակցել բոլորի ուժերի հետ:

-Ոչ իշխանական չորս ուժերը որպես մեխանիզմ կարևորում են արտահերթ նախագահական ու խորհրդարանական ընտրությունները:

-Խորհրդարանական ընտրություններին բոլորը մասնակցելու են առանձին, քանի որ ՀՀ-ում բոլոր ուժերի ներկայացուցիչներն իրենց պատկերացնում են ամենակարող: Ես մեծ սիրով իմ տեղը կզիջեմ:  Կառավարություն, վարչապետ, նախագահ փոխեցինք, հետո ո՞վ է նրանց փոխարինելու և ինչպե՞ս են ղեկավարելու երկիրը: ՀԱԿ-ը, օրինակ, ժամանակին ղեկավարում  էր  կառավարություն, ԱԺ, մենք բացթողումներ ունեցանք: Կոռուպցիայի մասին են խոսում, բայց կոռուպցիայի կնքահայրն հենց ՀԱԿ-ն է:

-Բայց այն ժամանակ պատերազմ էր…

 –Պատերազմ էր, բայց  կային համապատասխան միջոցներ: Եթե դրսից եկող միջոցները յուրացվում էին…

–Եթե ՀԱԿ-ը ձեզանից փաստեր ու ապացույցներ պահանջի միջոցների յուրացման համար, կարո՞ղ եք ներկայացնել:

-Ապացույցը ժողովրդի խոսքն է:

-Ժողովուրդը շատ բան կարող է ասել, դուք հստակ փաստեր   կներկայացնե՞ք:

-Եթե շատ ման գանք, բացթողումների փաստեր  կգտնենք:

Սոնա Դավթյան