Էրդողանը մայիսին ակնկալում է գների ռեկորդային աճ, որին կհաջորդի հետագա անկումը

Թուրքիայի նախագահ Ռեջեփ Թայիփ Էրդողանը հայտարարել է, որ տարեկան գնաճը կհասնի իր գագաթնակետին 2024 թվականի մայիսին, որից հետո այն կսկսի արագորեն նվազել։ Այս մասին նա հայտարարել է Ստամբուլում արտաքին տնտեսական հարաբերությունների խորհրդի նիստի ժամանակ։

«Մենք ակնկալում ենք, որ մայիսին տարեկան գնաճը կհասնի առավելագույնի, որին կհետևի արագ անկումը: Երկրորդ կիսամյակից մենք կթևակոխենք գնաճի անկման շրջան»,- նշել է Էրդողանը։

Երկրի ղեկավարն ընդգծել է, որ Թուրքիայի տնտեսությունը «ճիշտ ուղու վրա է», և նրա վարչակազմի գլխավոր առաջնահերթությունը գնաճը միանիշ թվի իջեցնելն է։

Մայիսի սկզբին Թուրքիայի Կենտրոնական բանկի ղեկավար Ֆաթիհ Քարահանը կանխատեսել էր, որ մայիսի վերջին երկրում տարեկան գնաճը կկազմի մոտ 75%: Ապրիլին այս ցուցանիշը տարեկան կտրվածքով պաշտոնական տվյալներով հասել է 69,8%-ի, թեև անկախ տնտեսագետները գնաճը շատ ավելի բարձր են գնահատել՝ 124,35%: