ԱԺ նիստում կառավարության հետ հարցուպատասխանի ժամին ԲՀԿ խմբակցության պատգամավոր Վահե Էնֆիաջյանը հորդոր հնչեցրեց. «Որոշ պաշտոնյաներ իրենց թույլ են տալիս նախարարին ոչ վայել վարք, ոչ կոռեկտ արտահայտություններ: Պարո’ն վարչապետ, հորդորում ենք, որ բացատրական աշխատանքներ տանեք այն նախարարների հետ, որոնք ոչ կոռեկտ պահվածք ունեն խորհրդարանում և խորհրդարանից դուրս: Եթե ուզում են կայանալ, թող այլ ձևաչափի մեջ դա անեն: Եթե ոչ, ապա կստանան ավելի կտրուկ պատասխան»,- ասաց նա:
Պատգամավորին պատասխանեց ԿԳ նախարար Արմեն Աշոտյանը, ով իրեն համարեց բարեկրթության նախարար, որը մի քանի անգամ ստիպված է խոսել բարեկրթության մասին:
«Ցանկացած մարդ ունի արժանապատվություն: Պատգամավորը նույնքան, որքան նախարարը և շարքային քաղաքացին, կազմված են նյարդային համակարգից, մսից ու արյունից, և ցանկացած սադրանք, որն ուղղված է կոնկրետ մարդու հանդեպ, արժանանում է արդարացի հակահարվածների: Կառավարության կազմում հիմնականում կայացած մարդիկ են, կրթություն և ինտելեկտ ունեն: Ամոթ է բոլորիս, որ քաղաքական երկխոսությունը իջնում է ձկնաշուկայի վաճառականների վիճաբանության մակարդակի: Քաղաքականությունը ինտելեկտուալ զբաղմունք է և դիմացինին խորը կսմթելու համար անգամ ինտելեկտ է պետք: Այստեղ ոմանք նստում են «Հելո Քիթիի» դեմքով, իսկ երկու ժամ անց բացում եմ հատուկ ֆինանսավորվող կայքեր ու տեսնում եմ, թե ինչեր են գրում»,- ասաց Աշոտյանը:
Աշոտյանի ելույթից հետո Վահե Էնֆիաջյանը նորից հայտարարեց, որ ինքը հարց չէր ուղղել, այլ հորդորով էր հանդես եկել:
.gif)
