Հունիսի 20-ը՝ Փախստականների համաշխարհային օր

Փախստականների համաշխարհային օր (ՄԱԿ-ի պաշտոնական լեզուներով՝ անգլ.՝ World Refugee Day, չինարեն՝ 世界难民日, իսպ.՝ Día Mundial de los Refugiados, ֆր.՝ Journée mondiale des réfugiés), ՄԱԿ-ի Գլխավոր Ասամբլեան 2000 թվականի դեկտեմբերի 4-ին ընդունել է որոշում (թիվ 55/76) հունիսի 20-ը Փախստականների համաշխարհային օր ճանաչելու մասին՝ աշխարհում փախստականների մասին իրազեկվածության բարձրացման նպատակով։

Գծապատկերը ցույց է տալիս ՄԱԿ-ի ՄԱՓԳՀ-ի մտահոգություններ ունեցող անձանց ընդհանուր թվաքանակի աճը

Պատմություն

2000 թվականի դեկտեմբերի 4-ին ՄԱԿ-ի Գլխավոր ասամբլեան 55/76 բանաձևով որոշել է, որ 2001 թվականից հունիսի 20-ը նշվում է որպես Փախստականների համաշխարհային օր։ Այս որոշման մեջ Գլխավոր ասամբլեան նշել է, որ 2001 թվականին նշվել է Փախստականների կարգավիճակի մասին 1951 թվականի Կոնվենցիայի 50-ամյակը[1]։

Աֆրիկյան փախստականների օրը մինչև 2000 թվականը նշվել է մի քանի երկրներում։ ՄԱԿ-ը նշել է, որ Աֆրիկյան միաբանության կազմակերպությունը (ԱՄԿ) համաձայնել է, որ փախստականների միջազգային օրը համընկնի Աֆրիկայի փախստականների օրվա հետ՝ հունիսի 20-ին։

Հռոմի կաթոլիկ եկեղեցում Միգրանտների և փախստականների համաշխարհային օրը նշվում է յուրաքանչյուր տարվա հունվարին, որը հիմնադրվել է 1914 թվականին Հռոմի Պապ Պիուս X-ի կողմից։

Միջոցառումներ

Ամեն տարի հունիսի 20-ին ՄԱԿ-ը, ՄԱԿ-ի Փախստականների հարցերով գերագույն հանձնակատարի գրասենյակը (ՄԱՓԳՀ) և աշխարհի անթիվ քաղաքացիական խմբավորումներ իրականացնում են Փախստականների համաշխարհային օրվա միջոցառումներ, որպեսզի հանրության ուշադրությունը հրավիրեն միլիոնավոր փախստականների և ամբողջ աշխարհում տեղահանված անձանց հիմնախնդիրներին, որոնք ստիպված են եղել պատերազմի, հակամարտության և հալածանքի պատճառով փախչել իրենց տներից։

Ամենամյա հիշատակի միջոցառումը նշվում է ավելի քան 100 երկրներում. այն նշում են պետական պաշտոնյաները, մարդասիրական օգնության աշխատողները, հայտնի մարդիկ, քաղաքացիական անձինք և բռնի տեղահանվածները։