Սփյուռքի մեր համայնքներն օգնություն են ուղարկում Քեսաբ

Սփյուռքի նախարար Հրանուշ Հակոբյանից armlur.am-ը հետաքրքրվեց` բացի պատգամավորական խումբ  Քեսաբ  գործուղելուց` ինչ այլ ռեալ  քայլեր են կատարվում քեսաբահայերին օգնելու համար:

Քեսաբահայության օգնությունը նախ և առաջ կազմակերպում են տեղում  շտապօգնության միավորները: «Նրանք առանց կորուստների դուրս հանեցին ժողովրդին:  Քեսաբահայերի բոլոր խնդիրները` կենցաղային, սնունդ լուծում են մեր հայրենակիցները, այն շտապ օգնության մարմինները, որոնց հետ մենք ամեն օր աշխատում ենք»,- ասաց նախարարը:

Նախարարն ասաց, որ ինքն անընդհատ կապի մեջ է  Քեսաբի քաղաքապետի հետ, որը ներկայացնում է իր խնդրանքներն ու ցանկությունները:

Տիկին Հակոբյանի խոսքով` քեսաբցիներն օր առաջ ուզում են վերադառնալ Քեսաբ: Դա է քեսաբցիների ամենամեծ ցանկությունը: «Իսկ դա կարող է  լինել այն դեպքում,  երբ ազատագրված կլինի Քեսաբը:  Սիրիական բանակն ու  միջազգային կառույցներն անում են ամեն ինչ այդ ուղղությամբ»,- ասաց  տիկին Հակոբյանը:

-Հայաստանից հումանիտար օգնություն  կուղարկվի՞ Քեսաբ:

-Սփյուռքի մեր համայնքներն օգնություն են ուղարկում Քեսաբ: Հայաստանը ևս այս առումով տանում է նախապատրաստական աշխատանքներ:  Իսկ  տեղում հումանիտար  օգնության կազմակերպման աշխատանքները դրված են մեր դեսպանի հյուպատոսի վրա, որոնք ամեն օր են այնտեղ: Փորձում ենք բոլորին մոբիլիզացնել, որպեսզի ինչքան հնարավոր է շատ օգնություն հասնի  Քեսաբ:

Սոնա Դավթյան