ՏԵՍԱՆՅՈՒԹ․ Գլխավոր դատախազությունը քննարկում է երգիչ Սպիտակցի Հայկոյի որդու՝ Հրաչյա Ղեւոնդյանի հարցը․ ինչ է սպասվում նրան

ArmLur.am-ին հասած տեղեկությունների համաձայն՝ Գլխավոր դատախազությունը ստացել է երգիչ Հայկ Ղեւոնդյանի որդու ՀՀ վերաքննիչ դատարանի կողմից կայացված որոշումը եւ քննարկում այն բողոքարկելու հարցը:

Ինչպես հայտնի է, մայիսի 23-ին Հրաչյա Ղեւոնդյանն ազատ էր արձակվել դատական նիստերի դահլիճից. դատարանը, հիմնավոր կասկածի բացակայության հիմքով, մերժել էր նրան կալանավորելու՝ քննիչի միջնորդությունը։

Բանն այն է, որ քննչական կոմիտեն հայտարարել էր, որ իշխանությունը բռնությամբ զավթելու փորձ է կանխել: Իշխանությունը յուրացնելու նախապատրաստության համար մեղադրանք է առաջադրվել հանրությանը «Սպիտակցի Հայկո» անունով հայտնի երգիչ Հայկ Ղեւոնդյանի որդուն, նրան կալանավորելու միջնորդություն է ներկայացվել:
Քննչական կոմիտեն տեսանյութ էր հրապարակել, որում մի տղամարդ դժգոհում էր վարչապետ Նիկոլ Փաշինյանի վարած քաղաքականությունից.

«Ստեղ մի ելք կա՝ մտնենք կառավարությունը գրավենք, մտնենք Ազգային ժողով՝ գրավենք, մտնենք ոստիկանության շենք՝ գրավենք: Հիմա ես պատրաստ եմ մեռնեմ, ցավդ տանեմ, պիտի կրակեն՝ թող կրակեն, ավելի լավ ա մի 10-20 մարդ մեռնի, բայց, ընկեր, երկիր, պահես»:

Քննչականը պնդում է, թե այս խոսքերի հեղինակը Հրաչյա Ղեւոնդյանն է, որը նպատակ է ունեցել մի խումբ անձանց հետ զավթելու իշխանությունը։ Թե ովքեր են այդ անձինք, իրավապահները դեռ չեն պարզել, բայց, ըստ նախաքննական մարմնի, դիտարկվել էր նաեւ հանրահավաքին այդ ծրագիրն իրագործելու հարցը:

Ղեւոնդյանը չի ընդունում իրեն առաջադրված մեղադրանքը։ Նրա փաստաբանը հայտարարել էր՝ ձայնագրությունը մոնտաժված է, կոնտեքստից կտրված, իսկ իր պաշտպանյալն իշխանությունը զավթելու որեւէ մտադրություն չի ունեցել:

Ավելին՝ ՀՀ վերաքննիչ դատարանը հունիսի 24-ին հրապարակեց որոշումը, եւ չբավարարեց դատախազությունը բողոքը, ու հիմա Դատախազությունում քննարկում են Վճռաբեկ դատարան դիմելու հարցը։ Ինչ է սպասվում, հայտնի երգչի որդուն կբողոքարկեն, թե ոչ, սպասենք զարգացումներին:

Մանրամասները՝ տեսանյութում։

Քնար Մանուկյան