Ոստիկաները Իրաքի քաղաքացուն անձամբ են տարել Կոտայքի բաժին․ ի՞նչ նպատակով

Իրաքի քաղաքացին 1987 թվականի ծնված Համազաջին Ջուդա Ալ-Ինիզին է։ Նրան իրավապահներն են անձամբ տարել ոստիկանության Կոտայքի բաժին, քանի որ ահազանգ են ստացել Իրաքի քաղաքացու մասնակցությամբ վիճաբանության մասին։

Արդյունքում,երբ տարել են բաժին նա ինքնավնասման է ցանկացել գնալ ու բաժնում սկսվել է վիճաբանություն, հնչել են կրակոցներ։ Այս պահին օտարերկրացին հիվանդանոցում է, վնասվածքներ են ստացել նաեւ ոստիկաններ։

Հիշեցնենք, որ ավելի վաղ ՀՀ Քննչական կոմիտեն հայտնել էր․ «2024 թվականի հուլիսի 19-ին՝ ժամը 23:36-ին, հաղորդում է ստացվել այն մասին, որ Աբովյան քաղաքում օտարերկրացի մի քաղաքացին խնդրել է զանգահարել 1-02 և ասել, որ ոստիկան մոտենա:

Ահազանգով մեկնած ՀՀ ՆԳՆ ոստիկանության աշխատակիցը ահազանգի վերաբերյալ պարզաբանումներ իրականացնելու նպատակով ՀՀ ՆԳՆ ոստիկանության Կոտայքի բաժին է հրավիրել նշված օտարերկացուն, ով գտնվելով ՀՀ ՆԳՆ ոստիկանության Կոտայքի բաժնի հերթապահ մասում, և օգտվելով հերթապահի օգնականի զբաղվածությունից ու անուշադրությունից, նախնական տվյալներով, ինքնասպանություն գործելու նպատակով վերցրել է հերթապահ մասի սեղանի տակ գտնվող «AKM» տեսակի ինքնաձիգը և այն բերել մարտական վիճակի։

Այդ նկատելով` ոստիկանության 2 աշխատակից փորձել է ինքնաձիգը վերցնել վերջինիս մոտից, սակայն այդ ընթացքում անձը կրակահերթ է արձակել, այնուհետև փողը մոտեցնելով իրեն՝ կրկին կրակահերթ է արձակել, ինչի արդյունքում վերջինս և ոստիկանության երկու աշխատակիցները ստացել են մարմնական վնասվածքներ: Աբովյան ԲԿ-ից ստացված հաղորդման համաձայն` ոստիկաններից մեկի մատն է վնասվել, մյուսի ձեռքի ափը, իսկ օտարերկրացին հրազենային վնասվածք է ստացել կրծքավանդակի աջ մասի շրջանում։

Դեպքի առթիվ 2024 թվականի հուլիսի 20-ին ՀՀ քննչական կոմիտեի Կոտայքի մարզային քննչական վարության Աբովյանի քննչական բաժնում ՀՀ քրեական օրենսգրքի 162-րդ հոդվածի 1-ին մասով, 173-րդ հոդվածի 1-ին մասով և 337-րդ հոդվածի 1-ին մասով նախաձեռնվել է քրեական վարույթ։

Նախաքննության շրջանակներում
կատարվել է դեպքի վայրի զննություն, որի ընթացքում ՀՀ ՆԳՆ ոստիկանության Կոտայքի բաժնի հերթապահ մասից հայտնաբերվել և վերցվել են ինքնաձիգի կրակված պարկուճներ, գնդակներ, արնանման հետքեր, վերցվել է նաև <> տեսակի ինքնաձիգը։

Հարցաքննվել են մի շարք անձինք։ Նշանակվել են դատաբժշկական, դատաձգաբանական փորձաքննություններ։

Նախաքննությունը շարունակվում է»։

Քնար Մանուկյան