Քամալա Հարիսը կարող է հաղթել ԱՄՆ նախագահական ընտրություններում․ Շոլց

Գերմանիայի կանցլեր Օլաֆ Շոլցը ԱՄՆ փոխնախագահ Քամալա Հարիսին անվանել է «կոմպետենտ և փորձառու» քաղաքական գործիչ, որը կարող է հաղթել ԱՄՆ նախագահական ընտրություններում։

Այս մասին Շոլցն ասել է ամենամյա ամառային մամուլի ասուլիսում։

«ԱՄՆ-ում նախընտրական քարոզարշավն, անշուշտ, հետաքրքիր կլինի՝ այժմ մի փոքր նոր կազմով և նոր աստղաբույլով», – Շոլցի խոսքերն է մեջբերում Reuters գործակալությունը։

Գերմանիայի կանցլերը բացահայտ կերպով աջակցում էր ԱՄՆ նախագահ Ջո Բայդենի թեկնածությանը, մինչև վերջինս հուլիսի 21-ին հայտնեց ընտրապայքարից դուրս գալու և փոխնախագահ Քամալա Հարիսին աջակցելու մասին։

«Կարծում եմ՝ շատ հնարավոր է, որ Քամալա Հարիսը հաղթի ընտրություններում, բայց դա կորոշեն ամերիկացի ընտրողները», – նշել է Շոլցը։

Գերմանիայի կանցլերը հայտնել է, որ մի քանի անգամ հանդիպել է Հարիսին։

«Նա կոմպետենտ և փորձառու քաղաքական գործիչ է, որը հստակ գիտի՝ ինչ է անում։ Նա գիտի, թե ինչ է ուզում և ինչ կարող է անել», – հավելել է կանցլերը։

66-ամյա Շոլցին նաև հարցրել են՝ արդյոք ինքը կարող է հրաժարվել վերընտրվելուց, սակայն նա նշել է, որ կրկին կառաջադրվի կանցլերի պաշտոնում։