ԵՐԿԱՐԱԺԱՄԿԵՏ ՏՆՏԵՍԱԿԱՆ ՍՊԱՍՈՒՄՆԵՐ

2024 թվականի հուլիսի 1-ից հուլիսի 15-ն ընկած ժամանակահատվածում երկրի վիճակագրական կոմիտեն հրապարակել է մի շարք տվյալներ։ Հունիսին երկրում գնաճն ակնկալվում է արագանալ, իսկ հեռահաղորդակցության ոլորտում եկամուտների աճի տեմպերը նվազել են։ Չնայած գնաճի արագացմանը՝ աճի տեմպերը զգալիորեն ցածր են ԿԲ-ի նպատակային մակարդակից: Կայուն արժույթը եւ երկրորդ ամիսն անընդմեջ տնտեսական ակտիվության աճի փոքր սառեցումը պետք է խթանեն երկրի Կենտրոնական բանկի դրամավարկային քաղաքականության հետագա թուլացումը։

Հայաստանում հունիսին գնաճի տարեկան աճը կազմել է 0,8% (կանխատեսված 0,2%-ի դիմաց)։ Սակայն ամսվա կտրվածքով գնանկում է գրանցվել՝ 0.9% ամսական։ Գնաճի հիմնական շարժիչ ուժը եղել է ծառայությունների գների աճը (+2.7% տարեկան): Պարենային ապրանքներն ու ոչ ալկոհոլային խմիչքները էժանացել են համապատասխանաբար տարեկան 0.7%-ով եւ 2.4%։ Գնաճի արագացումը սպասվածից ավելի արագ կարող է ծառայել որպես երկրում ներդրումային ակտիվության աջակցության փոքր գործոն, թեեւ մենք կարճաժամկետ հեռանկարում չենք ակնկալում էական ազդեցություն ֆոնդային շուկայի դինամիկայի վրա։

l Հայաստանում պղնձի խտանյութի արտադրության ծավալը 2024 թվականի առաջին հինգ ամիսներին տարեկան կտրվածքով աճել է 27,3%-ով՝ հասնելով մոտ 129,997 հազար տոննայի։ Ցինկի եւ մոլիբդենի խտանյութերի արտադրությունը նույնպես տարեկան կտրվածքով աճել է 9,3%-ով եւ 19,9%-ով համապատասխանաբար՝ կազմելով 4,42 հազար տոննա եւ գրեթե 6,69 հազար տոննա։ Ֆերոմոլիբդենի արտադրությունն, ընդհակառակը, նվազել է։ Հատկանշական է, որ հունվար-մայիսին բոլոր չորս մետաղների արտադրությունն աճել է 23,1%-ով՝ հունվար-ապրիլ ժամանակահատվածի համեմատ։ Նման դինամիկան արդեն պետք է արտացոլվի դրամի ներկայիս գնանշումներում, թեեւ այժմ արժույթի շարժն ավելի շատ կախված է թանկարժեք մետաղների եւ քարերի առեւտրից եւ դրանց գների տեղաշարժից, ինչը պայմանավորված է արտահանման վերջին աճող, հսկայական մասնաբաժնով (ապրիլին՝ մոտավորապես 82%-ով):

l Տնտեսական ակտիվությունը Հայաստանում 2024 թվականի հունվար-մայիսին տարեկան կտրվածքով աճել է 11,2%-ով, իսկ մայիսին՝ 5,2%-ով (ապրիլի 10,4%-ի դիմաց): Ընդ որում, առավել ակտիվ են առեւտուրը (+24,6%) եւ արդյունաբերությունը (+22,0%)։ Նման դինամիկան կարող է խթանել Կենտրոնական բանկին էլ ավելի նվազեցնել տոկոսադրույքը, եթե հունիսi տվյալները շարունակեն այս միտումը։ Արտաքին առեւտրի շրջանառությունը նույնպես շարունակել է աճել. արտահանումը մայիսին աճել է տարեկան 57,4%-ով, իսկ ներմուծումը՝ տարեկան ընդամենը 17,2%-ով, ինչը պետք է աջակցի երկրի արժույթին։

l Հեռահաղորդակցության ոլորտի եկամուտները (հեռուստատեսային եւ ռադիոհաղորդումների ստեղծում եւ հեռարձակում, հեռահաղորդակցական գործունեություն) առաջին 5 ամիսների ընթացքում ցույց են տվել աճի տեմպերի աննշան սառեցում մինչեւ 5.4% տարեկան` 4 ամիսների 6.3% տարեկան աճի դիմաց: Առանձին-առանձին, մայիսին եկամուտների աճը կազմել է մոտ 2,0%: Եկամուտների աճի թուլացումը, հավանաբար, արտացոլվել է նաեւ ներդրողների տրամադրվածության եւ Telecom Armenia-ի բաժնետոմսերի գնի վրա:

IDBank-Ը ՇԱՐՈՒՆԱԿՈՒՄ Է ԾՐԱԳԻՐԸ

Արդեն 3 ամիս է, ինչ մեկնարկել է IDBank-ի «Քո կողքին» ծրագիրը՝ հատուկ Արցախից բռնի տեղահանված մեր հայրենակիցների համար։ Ծրագրի շահառու դարձած 150 երեխայի համար IDBank-ը ամեն ամիս հատկացնում է 40.000 դրամ։

Բանկից տեղեկացնում են, որ այսուհետ աջակցությունը կտրամադրվի շահառու 42 ընտանիքին IDBank-ի լոյալության նոր միավորի՝ idcoin-ի միջոցով։ Այն հնարավոր չէ ո՛չ գնել, ո՛չ փոխանակել, եւ ո՛չ էլ վաճառել։ Idcoin-ը կարելի է ստանալ միայն որպես նվեր՝ IDBank-ից կամ «Իդրամ»-ից։

IDBank-ի հաղորդակցման բաժնի ղեկավար Տաթեւիկ Վարդեւանյանի խոսքով՝ idcoin-ն արդեն հասանելի է նաեւ «Քո կողքին» ծրագրի շահառուների համար։ «Նրանք կարող են Idram&IDBank հավելվածում տեսնել idcoin-ները եւ դրանք ծախսել ըստ ցանկության՝ շուրջ 22 000 վաճառակետերում, որտեղ կա «Իդրամ» QR-ով վճարման հնարավորություն, այսինքն՝ հոգալ ինչպես կենցաղային հարցեր, այնպես էլ, օրինակ, վճարել երեխայի դասընթացների, խմբակների, կրթական նյութերի համար եւ այլն», – ասում է Տաթեւիկ Վարդեւանյանը։

Նշենք, որ idcoin կարելի է ստանալ պրոդուկտների, արշավների, հավատարմության այլ ծրագրերի շրջանակում, որոնց մասին կարելի է տեղեկանալ IDBank-ի պաշտոնական կայքից: Իսկ idcoin-ով գնումները շատ պարզ են. ուղղակի անհրաժեշտ է սքանավորել QR կոդը Idram&IDBank հավելվածով եւ համակարգը, ի թիվս վճարման այլ աղբյուրների, կառաջարկի նաեւ idcoin-ը։

Չմոռանանք նշել, որ idcoin-ը հնարավոր է օգտագործել նաեւ կոմբո-վճարումների ժամանակ։ Համակարգն ավտոմատ կառաջարկի վճարել idcoin-ով, եւ եթե idcoin-ի մնացորդը չբավարարի, ապա գումարի մնացած մասը, Ձեր ընտրությամբ, կարող է գանձվել ինչպես Ձեր` IDBank-ի քարտերից ու հաշիվներից կամ «Իդրամ» դրամապանակից, այնպես էլ Idplus լոյալության հարթակում առկա բոնուսներից ու նվեր քարտերից։

«Քո կողքին» ծրագիրը, ինչպես եւ հայտարարված էր, շարունակվելու է մինչեւ տարվա վերջ, եւ շահառուները, ծրագրի պայմաններին համապատասխանելու դեպքում, այս ընթացքում չեն փոփոխվելու։

«ՅՈՒՆԻԲԱՆԿ». ՊԱՐՏԱՏՈՄՍԵՐ

«Յունիբանկը» ժամկետից շուտ ավարտեց 2 մլրդ ՀՀ դրամ եւ 5 մլն ԱՄՆ դոլար ծավալով պարտատոմսերի տեղաբաշխման գործընթացը: Ցուցակման ավարտից հետո պարտատոմսերը կշրջանառվեն երկրորդային շուկայում՝ AMX Հայաստանի ֆոնդային բորսայի առեւտրային հարթակում:

Դրամային պարտատոմսերի տարեկան եկամտաբերությունը կազմում է 9.75%, ԱՄՆ դոլարով պարտատոմսերինը՝ 5%: Արժեկտրոնային եկամուտը կվճարվի եռամսյակը մեկ: Պարտատոմսերի շրջանառության ժամկետը կազմում է 36 ամիս:

Ծրագրային ազդագիրը (գրանցված է 05.06.2024թ. թիվ 1/204 Ա), դրա լրացումները եւ սույն թողարկման վերջնական պայմանները հրապարակված են www.unibank.am կայքում:

web3 ՀԱՄԱՅՆՔԻ ՍԵՄԻՆԱՐԸ՝ ՉԻՆԱՍՏԱՆՈՒՄ

Հայաստանյան web3 համայնքը Չինաստանի Ուհան քաղաքում մասնակցել է միջազգային սեմինարի՝ նվիրված բլոկչեյնին եւ կիբեռանվտանգությանը։

Սեմինարին մասնակցել են ոլորտի այնպիսի առաջատարներ, ինչպիսիք են Web3 Հայաստան հիմնադրամը, Hexens-ը, Blockstars-ը, Codeex-ը, RegTechFlow-ն եւ DigiMinds Tec-ը` առաջատար տեխնոլոգիաների ձեռնարկությունների միության (ԱՏՁՄ) նախաձեռնությամբ։

Հայկական web3 համայնքը սեմինարին ներկայացրել է իր փորձը, ինչպես նաեւ նոր կապեր հաստատել չինական web3 համայնքի ներկայացուցիչների հետ, արժեքավոր գիտելիքներ ձեռք բերել բլոկչեյնի եւ կիբեռանվտանգության զարգացումների վերաբերյալ։

«Հայաստանը միշտ եղել է տեխնոլոգիական նորարարության առաջնագծում, եւ մեր մասնակցությունը Ուհանի սեմինարին ընդգծում է բլոկչեյնի եւ կիբեռանվտանգության ոլորտում առաջատար դիրքեր գրավելու մեր հանձնառությունը։ Մենք հպարտ ենք, որ ներկայացնում ենք Հայաստանը եւ կիսում ենք ապահով եւ ապակենտրոն ապագայի մեր տեսլականով», – նշում է WEB3 Հայաստան հիմնադրամի ներկայացուցիչը։

Ուհանում Հայաստանի ներկայացուցիչները պատմել են «Բլոկչեյն եւ Web3 տեխնոլոգիաներ» մասնագիտությամբ բակալավրի որակավորում տրամադրող աշխարհում առաջին եւ միակ կրթական ծրագրի մասին, որը վերջերս էր ներկայացվել հանրությանը։ Այս ծրագիրը Հայաստանի ազգային պոլիտեխնիկական համալսարանի, ՀՀ բարձր տեխնոլոգիաների արդյունաբերության նախարարության եւ Web3 Հայաստան հիմնադրամի նախաձեռնությունն է, եւ մեր երկիրը միակն է, որ առաջարկում է բակալավրի կոչում «Բլոկչեյն եւ Web3 տեխնոլոգիաներ» մասնագիտությամբ։

ՀԱՅՏԱՐԱՐՈՒԹՅՈՒՆ

Ես՝ Արմեն Վաչիկի Մուրադյանս, հայտնում եմ, որ «Ֆարմ Կրեդիտ Արմենիա» ՈՒՎԿ-ից ձեռք բերված YTO-404 մակնիշի տրակտորի 98-73 SL համարանիշները կորել են: Գտնողին խնդրում եմ զանգահարել +374 95 769 999 հեռախոսահամարով:

ՊԵՏՊԱՐՏՔԸ ՀԱՏԵԼ Է 12 ՄԼՐԴ ԴՈԼԱՐԻ ՇԵՄԸ

«ՀՀ կառավարության անխոնջ ու ազգափրկիչ գործունեության արդյունքում՝ ՀՀ պետական պարտքը հունիսի 1-ի դրությամբ հատել է 12 ՄԻԼԻԱՐԴ ԴՈԼԱՐԻ շեմը»։

Այս մասին իր էջում գրել ԱԺ «Հայաստան» խմբակցության պատգամավոր  Արթուր Խաչատրյանը:

«Եթե բաժանենք բնակչության թվի վրա, պարտքի յուրաքանչյուրիս բաժինը 4 հազար դոլարից ավելի է։ Հիշե՛ք այս թվերը, երբ հաջորդ անգամ քանդվող ասֆալտը ձեր աչքը փորձեն մտցնել…», – նշել է նա: