Իրանի գերագույն հոգևոր առաջնորդ այաթոլլա Ալի Խամենեին և նախագահ Մասուդ Փեզեշքիանն արձագանքել են Թեհրանում պաղեստինյան ՀԱՄԱՍ շարժման քաղբյուրոյի ղեկավար Իսմայիլ Հանիյեի սպանությանը՝ խոստանալով վրեժ լուծել Իսրայելից։ Խամենեին հայտարարել է, որ Իսրայելը դաժան պատժի կարժանանա։
«Այդ գործողությամբ սիոնիստական հանցավոր և ահաբեկչական վարչակարգն առիթ է ստեղծել անողոք պատժի համար, և մենք մեր պարտքն ենք համարում վրեժ լուծել նրա արյան համար, ով նահատակի մահով վախճանվեց Իրանի Իսլամական Հանրապետության տարածքում», – մեջբերում է Խամենեիի մամուլի ծառայության տարածած հայտարարությունից ՏԱՍՍ-ը։
Իսկ Իրանի նորընտիր նախագահ Մասուդ Փեզեշքիանը, որի երդմնակալության առիթով էր Հանիյեն ժամանել Թեհրան, X սոցիալական ցանցում գրել է, որ երկիրը կպաշտպանի իր ինքնիշխանությունը և «ահաբեկիչ օկուպանտներին կստիպի զղջալ իրենց վախկոտ արարքի համար»։
Իրանի նախագահն ընդգծել է, որ «Իրանի և Պաղեստինի ժողովուրդների միջև կապն ավելի ամուր կլինի, քան նախկինում, դիմադրությանն աջակցությունն ավելի ուժեղ, քան երբևէ»:
Իրանի Ղոմ քաղաքի Ջամքարան մզկիթի գմբեթի վրա բարձրացվել է վրեժխնդրության կարմիր դրոշը։ Այս մասին հայտնում է Mehr գործակալությունը:
Նշվում է, որ այս դրոշն առաջին անգամ սրբավայրի գմբեթին ծածանվել է Իսլամական հեղափոխության պահապանների կորպուսի հրամանատար Ղասեմ Սոլեյմանիի սպանությունից հետո՝ ի նշան նրա արյան վրեժի։
.gif)
