Հարձակվել են ՆԱՏՕ-ում Ադրբեջանի դեսպանի ու կնոջ վրա, ատրճանակով հարվածել ու գողացել թանկարժեք ժամացույցները

Օգոստոսի 6-ի կեսօրին Բրյուսելում կողոպտել են ՆԱՏՕ-ում Ադրբեջանի դեսպան Ջաֆար Հուսեյինզադեին և նրա կնոջը։

Այս մասին հայտնում է բելգիական Sudinfo հրատարակությունը։

Միջադեպը տեղի է ունեցել այն ժամանակ, երբ վարձակալած սկուտերով երկու հարձակվողներ հարձակվել են դիվանագետի և նրա կնոջ վրա՝ ատրճանակի կոթով հարվածելով նրանց գլխին։

Հարձակման արդյունքում նրանցից խլել են երկու զույգ շքեղ Rolex ժամացույցներ՝ ընդհանուր 90 հազար եվրո արժողությամբ։

Նշվում է, որ հարվածի հետևանքով դեսպանի կնոջ գլխից սկսել է արյուն հոսել, նրան տեղափոխել են հիվանդանոց, սակայն լուրջ վնասվածքներ չկան: