![](https://armlur.am/wp-content/uploads/2024/08/94dTbw497vKBXzjHUwgf8aXTBneH2jmBf6lKzfgE.jpg)
ՄԱԿ-ում Լիբանանի մշտական ներկայացուցչությունը բողոք է ներկայացրել Անվտանգության խորհրդին՝ կապված իսրայելական ռազմական ինքնաթիռների կողմից լիբանանյան տարածքների, այդ թվում՝ մայրաքաղաք Բեյրութի ձայնային պատնեշը խախտելու հետ: Այս մասին հայտնում է Լիբանանի NNA ազգային լրատվական գործակալությունը։
Աղբյուրի փոխանցմամբ՝ բողոքը ներկայացվել է արտաքին գործերի նախարարի պաշտոնակատար, դոկտոր Աբդալլահ Բու Հաբիբի հանձնարարականի հիման վրա:
Բողոքում Լիբանանը դատապարտել է այդ խախտումները, որոնք Լիբանանի ինքնիշխանության և օդային տարածքի, ինչպես նաև ՄԱԿ-ի Անվտանգության խորհրդի 1701 բանաձևի (թողարկված 2006թ.) կոպտագույն խախտում են:
Նշվում է, որ այդ գործողությունները խախտում են միջազգային մարդասիրական իրավունքի մի շարք դրույթներ: Դրանք արգելում են կոլեկտիվ պատժի և հոգեբանական ահաբեկման այն բոլոր մեթոդները, որոնք կիրառվում են Իսրայելի կողմից՝ ահաբեկելու և խուճապ տարածելու համար հասարակության առավել խոցելի շերտերի, մասնավորապես՝ երեխաների շրջանում։