«Հայֆիլմի» տարածքը հանրային գերակա շահ ճանաչվեց. այն կտրամադրվի Ակադեմիական քաղաքին

Ակադեմիական քաղաքի համար Համո Բեկնազարյանի անվան «Հայֆիլմի» տարածքը և Երևան քաղաքի 17-րդ թաղամասը ճանաչվեցին հանրային գերակա շահ։ Որոշումն ընդունվեց ՀՀ կառավարության այսօրվա նիստի ժամանակ։

Ակադեմիական քաղաքի մաստեր պլանն արդեն պատրաստ է․ Փաշինյանը մանրամասներ է ներկայացրել
Նշվում է, որ «Երևան քաղաքի և Արագածոտնի մարզի Աշտարակ համայնքի Սասունիկ բնակավայրի վարչական սահմաններում գտնվող որոշ տարածքների նկատմամբ հանրության գերակա շահ ճանաչելու մասին» որոշումն ընդունվել է ՀՀ կառավարության 2024 թ. հունվարի 4–ի նիստում։

«Ակադեմիական քաղաքի ստեղծման նպատակով որպես հիմնական տեղամաս ընտրվել է Երևան քաղաքի 17–րդ թաղամասի տարածքը, որի սահմաններում առկա են ինչպես պետության և համայնքի սեփականություն հանդիսացող հողամասեր, այնպես էլ ֆիզիկական և իրավաբանական անձանց պատկանող հողամասեր»,– ասված է որոշման հիմնավորման մեջ։

Որոշման մեջ նաև նշվում է, որ հիմնական տեղամասում առկա են համայնքի սեփականություն հանդիսացող և ֆիզիկական ու իրավաբանական անձանց սեփականություն հանդիսացող հողամասեր, այդ նպատակով պետք է ապահովվի սեփականատերերի արդարացի և համարժեք փոխհատուցումը։
Ակադեմիական քաղաքի առաջին շենքը պատրաստ կլինի մինչև 2029 թվականը. Թոբիաս Քեյլ

Այդ նպատակով ՀՀ կառավարությունը նպատակահարմար է գտել, որ սեփականության օտարման գործընթացը թե՛ գործիքակազմի և թե՛ փորձառության տեսանկյունից պետք է կազմակերպեն Արագածոտնի մարզպետն ու Երևանի քաղաքապետը։

Հիշեցնենք որ «Ժողովուրդ» օրաթերթը գրել էր․ ««Ժողովուրդ» օրաթերթը տեղեկացավ, որ այսօր ՀՀ կառավարության նիստում որոշվելու է ՀՀ Արագածոտնի մարզի Աշտարակ համայնքի Սասունիկ բնակավայրի վարչական սահմաններում գտնվող որոշ սահմաններ գերակա շահ ճանաչելու հարցը։

«Ժողովուրդ» օրաթերթին հայտնի դարձավ, որ կառավարությունը նպատակ ունի Սասունիկ համայնքում հողերը վերցնել գյուղացիների ձեռքից եւ այնտեղ Ակադեմիական քաղաքի ծրագիրն իրականացնել։ Պաշտոնական փաստաթղթերից տեղեկացանք նաեւ, որ հարցը զեկուցելու է ՀՀ ԿԳՄՍ նախարար Ժաննա Անդրեասյանը։

Ըստ այդ նախագծի՝ Հայաստանի Հանրապետության կառավարության 2023 թվականի հոկտեմբերի 19-ի N 1802-Լ որոշմամբ հաստատված «Ակադեմիական քաղաք» ծրագրի (այսուհետ՝ ծրագիր) իրականացման նպատակով սույն որոշման NN 1, 2 եւ 3 հավելվածներում նկարագրված՝ Երեւան քաղաքի եւ Հայաստանի Հանրապետության Արագածոտնի մարզի Աշտարակ համայնքի Սասունիկ բնակավայրի վարչական սահմաններում գտնվող որոշ տարածքների նկատմամբ ճանաչել հանրության գերակա շահ՝ հետեւյալ հիմնավորումներով՝ ծրագրի իրականացման շահը գերակայում է օտարվող սեփականության սեփականատերերի շահերի նկատմամբ, քանի որ ծրագիրը միտված է տնտեսական կայուն եւ առաջընթաց զարգացման համար անհրաժեշտ պայմանների ստեղծմանը՝ ժամանակակից կրթական, հետազոտական եւ նորարարական գործունեությունը երաշխավորող միջավայր ստեղծելու միջոցով։

Ակադեմիական քաղաքը երաշխավորելու է ձեռք բերված գիտելիքի լավագույն կիրառությունը` ծառայելով հանրությանը սոցիալական, տնտեսական եւ մշակութային մարտահրավերների հաղթահարման համար, ինչպես նաեւ հանրային եւ մասնավոր կազմակերպությունների հետ համագործակցությամբ ապահովելու է ստեղծվող գիտելիքի, տեխնոլոգիաների եւ նորարարությունների ներդրումն ու ծառայեցումը հանրային բարեկեցությանն ու առաջընթացին։

Ի դեպ, վերջնաժամկետը սահմանված է մինչեւ 2025 թվականի սեպտեմբերի 30-ը, իսկ այս ծրագրի իրականացման լիազոր-պատասխանատուն էլ Արագածոտնի մարզպետն է լինելու՝ Սերգեյ Մովսիսյանը։

Հավելենք նաեւ, որ նշված է՝ այս հայտարարությունը ուժի մեջ է մտնելու պաշտոնական հրապարակման հաջորդող 10-րդ օրը»: