Կրակել են թափորի վրա

Կրկին անհանգիստ է Տավուշի մարզի Բերդի տարածաշրջանի սահմանագոտում:

Այգեպարի գյուղապետ Անդրանիկ Այդինյանը մեզ ասաց, որ մարտի 27-ի կեսգիշերից  մոտ մեկուկես ժամ ադրբեջանական Ալիբեյլի գյուղի մարտական հենակետերից խոշոր տրամաչափի գնդացիրներով  գնդակոծվել է Այգեպարի կենտրոնը: Գնդակները դիպել են տների պատերին, տանիքներին, գյուղի ճանապարհների հենապատերին: Բարեբախտաբար, տուժածներ չկան:  Այգեպար համայնքի ղեկավարն ասաց, որ այդ օրը՝  ժամը 21-ից  Ալիբեյլիում  տարօրինակ շարժ  է կատարվել. գյուղից  տարհանվել են ավտոմեքենաները, ադրբեջանական գյուղի լույսերը մարվել են:

Այդ կերպ ադրբեջանցիները նախապատրաստվել են Այգեպարի ուժեղ  գնդակոծությանը: «Չենք հասկանում, թե նրանց միտքն ինչ է,  ինչ են ուզում, մեր գյուղը ողջ գիշերը չի քնել»՝ ասաց Այգեպարի գյուղապետը: Այդինյանի վկայությամբ՝ հայ սահմանապահները պատասխան կրակով ադրբեջանցիներին ստիպել են դադարեցնել կրակը:  Ներքին Կարմիրաղբյուրի գյուղապետ Մանվել Կամենդատյանն էլ հայտնեց, որ ադրբեջանական զինուժը  մարտի 27-ին՝ ժամը 23-ի սահմաններում, մոտ մեկ ժամ գնդակոծել է  գյուղի տարածքը:

Բարեբախտաբար, տուժածներ և վնասներ չկան:   Իսկ Չինարի համայնքի ղեկավար Սամվել Սաղոյանը տեղեկացրեց, որ մարտի 27-ին սահմանամերձ այդ համայնքում կատարվում էր 52 տարեկան հասակում կյանքից հեռացած Հայկազ Աղասյանի հուղարկավորությունը, որի ընթացքում ազերիները կրակ են բացել թափորի վրա: Բարեբախտաբար, այդ  ժամանակ գերեզմանատանն արդեն թաղումը կատարված է եղել  և գյուղացիներին հաջողվել է խուսափել ադրբեջանական գնդակոծության թիրախ դառնալուց:

Մովսեսի համայնքապետ Արարատ Ավալյանն էլ տեղեկացրեց, որ մարտի 27-ի  գիշերը՝ ժամը 23.30-ից մինչև ժամը 01-ի կողմերը ադրբեջանական զինուժը «ԴՇԿ» և «Շիլկա» զինատեսակներից գնդակոծել է գյուղի տարածքը,  և միայն հայկական զինուժի պատասխան կրակից հետո   ադրբեջանցիները դադարեցրել են կրակը: Ազերիների գնդակներից  խոցվել են տների պատերը,  տանիքներին անցքեր են բացվել: «Երբ անձրև գա, այդ անցքերից ջուրը  ներս է լցվելու»,- նշեց Արարատ Ավալյանը: Նա ասաց, որ մարտի 28-ի ցերեկը խաղաղ է  եղել: Սակայն Բերդի սահմանագոտում  տիրող փխրուն անդորրը ազերիների կողմից ամեն պահ կարող է  խախտվել:

Ոսկան Սարգսյան