Հրաձիգներ Գոռ Խաչատրյանը և Մարի Ղազարյանը՝ Եվրոպայի երիտասարդական առաջնության բրոնզե մեդալակիրներ

Չեխիայի Պլզեն քաղաքում ընթացող վազող թիրախ ձևի Եվրոպայի առաջնության մրցումային երկրորդ օրը պայքարի մեջ են մտել Հայաստանը ներկայացնող երիտասարդ հրաձիգները։

10մ վազող թիրախ մրցաձևի երիտասարդ տղաների պայքարում բրոնզե մեդալակիր է դարձել Գոռ Խաչատրյանը։ Մեր մարզիկը 567 միավոր արդյունքով առաջին հորիզոնականով անցել է կիսաեզրափակիչ։ Կիսաեզրափակչում Խաչատրյանը 2:6 հաշվով պարտվել, իսկ արդեն բրոնզե եզրափակչում 6:3 հաշվով հաղթել է Ֆինլանդիայի ներկայացուցչին։

Նույն մրցաձևի աղջիկների պայքարում Մարի Ղազարյանը 519 միավոր արդյունքով, 4-րդ տեղով դուրս է եկել կիսաեզրափակիչ և բարելավելով արդյունքը կանգնել պատվո հարթակի 3-րդ աստիճանին։

Ղազարյանը կիսաեզրափակչում 6:8 հաշվով պարտվել, իսկ բրոնզե մեդալի համար եզրափակչում 7:5 հաշվով հաղթել է ուկրաինացի մրցակցին։