Ռուսաստանը և Արաբական Միացյալ Էմիրությունները դիվանագիտական օգնություն են առաջարկել Telegram-ի հիմնադիր Պավել Դուրովին, սակայն վերջինս հրաժարվել է դրանից։ Այս մասին հայտնում է POLITICO-ն՝ հղում անելով Ֆրանսիայի կառավարության պաշտոնյային, որի անունը չի նշվում։
«Նշված անձը հրաժարվել է Ռուսաստանի հյուպատոսական պաշտպանությունից և ԱՄԷ-ի հյուպատոսական այցից, սակայն համաձայնել է ԱՄԷ-ի դեսպանատանը տեղյակ պահել իրավիճակի մասին», – մեջբերում է հրատարակությունը աղբյուրին։
Իր հերթին ԱՄԷ-ի դիվանագիտական ներկայացուցչության պաշտոնյան POLITICO-ին ասել է, որ Աբու Դաբին կապի մեջ է Փարիզի հետ Դուրովի գործով։
«Մենք այս գործով կապի մեջ ենք Ֆրանսիայի իշխանությունների և Պավել Դուրովի ներկայացուցիչների հետ», – ասել է հրատարակության զրուցակիցը։
Բացի Ֆրանսիայի և Ռուսաստանի քաղաքացի լինելուց, Պավել Դուրովը նաև ԱՄԷ-ի քաղաքացի է։ Նա բնակվում է ԱՄԷ-ում, և այնտեղ էլ գտնվում է Telegram-ի կենտրոնական գրասենյակը: Դուրովը նաև Սենթ Կիթս և Նևիս կարիբյան պետության քաղաքացի է. այս պետությունը քաղաքացիություն է շնորհում ներդրումների դիմաց։
Դուրովի կարողությունը գնահատվում է 15 միլիարդ դոլար։
Ավելի վաղ Դուրովը զարմանք էր հայտնել Ֆրանսիայում Telegram-ի աշխատանքի հետ կապված հետաքննության շրջանակներում իր ձերբակալության կապակցությամբ։
«Անցյալ ամիս ես Փարիզ ժամանելուց հետո չորս օր հարցաքննվեցի ոստիկանությունում։ Ինձ ասացին, որ ես անձամբ եմ պատասխանատու այն բանի համար, որ այլ մարդիկ անօրինական օգտագործում են Telegram-ը», – սեպտեմբերի 5-ին գրել է Դուրովը Telegram-ի իր ալիքում։
Նա հավելել է, որ Telegram-ն ունի պաշտոնական ներկայացուցիչ Եվրամիությունում, որին ԵՄ երկրները կարող են համագործակցության հարցումներ ուղարկել խնդիրների դեպքում։
Բացի այդ, գրել է Դուրովը, Ֆրանսիայի իշխանությունները բազմաթիվ հնարավորություններ են ունեցել անձամբ կապ հաստատելու իր հետ։ Նա հիշեցրել է, որ ինքը Ֆրանսիայի քաղաքացի է և «հաճախակի հյուր է եղել Դուբայում Ֆրանսիայի հյուպատոսությունում»։
«Նախկինում, երբ ինձնից օգնություն խնդրեցին, ես անձամբ օգնեցի Ֆրանսիային Telegram-ի միջոցով թեժ գիծ ստեղծել՝ ֆրանսիական տարածքում ահաբեկչական հարձակումների սպառնալիքի դեմ պայքարելու համար», – հայտնել է Դուրովը։
Օգոստոսի 28-ին նրան մեղադրանք է առաջադրվել իր մեսենջերի միջոցով հանցավոր բովանդակության տարածմանը չհակազդելու համար։ Telegram-ի հիմնադիրը 5 մլն եվրո գրավի դիմաց ազատ է արձակվել կալանքից՝ խիստ դատական հսկողության ներքո։ Նրան արգելվում է լքել Ֆրանսիայի տարածքը։
.gif)
