ՖՈՏՈ. Ով է կյանքից զրկված ոստիկանը

ArmLur.am-ի բացառիկ տեղեկությունների համաձայն՝ սպանված ոստիկանը կապիտան Հայրապետ Ստեփանյանն է:

Նշենք նաև, որ սպանողին իրավապահները փնտրում են, նա զինված է:

Ավելի ուշ ոստիկանությունից ArmLur.am-ին հայտնեցին, որ ծառայողական պարտականությունները կատարելիս զոհվել է ՆԳՆ ոստիկանության Արմավիրի բաժնի քրեական հետախուզության բաժանմունքի օպերլիազոր, ոստիկանության կապիտան Հայրապետ Ստեփանյանը։

«Հրազենային վիրավորում է ստացել նույն բաժնի համայնքային ոստիկանության տեսուչ, ոստիկանության լեյտենանտ Արթուր Այվազյանը, որը տեղափոխվել է բուժհաստատություն»,- հայտնում են ոստիկանությունից։

 Հիշեցնենք, որ գրել էինք՝ ArmLur.am-ի տեղեկություններով՝ այս պահին ողջ իրավապահ համակարգի ղեկավար կազմը Արմավիրի մարզում է։

Մասնավորապես, դեպքի վայրում է ՆԳն նախարար Վահե Ղազարյանը, ՀՀ ոստիկանապետ Արամ Հովհաննիսյանը եւ պաշտոնյաներ։

ArmLur.am-ին հասած բացառիկ տեղեկությունների համաձայն՝ ոստիկանների վրա կրակած ու ոստիկաններից մեկին սպանած անձը փախուստի է դիմել, ու նրան այս պահին փնտրում են։ Ողջ մարզում սկսվել է ուժեղացված ծառայություն։

Ավելի վաղ գրել էինք, որ ArmLur.am-ի տեղեկություններով՝ այսօր՝ սեպտեմբերի 7-ին, կրակոցներ են հնչել Արմավիրի մարզում։

ArmLur.am-ի բացառիկ տեղեկությունների համաձայն՝ ոստիկան է սպանվել, իսկ մյուս ոստիկանը վիրավոր է:

Արմավիրի ոստիկանության օպերատիվ բաժնի աշխատակիցները տեղեկություններ են ստացել կրակոցների մասին և շտապել են դեպքի վայր:

Արդյունքում, դեպքի վայրում տեսնելով ոստիկաններին, միջադեպի մասնակիցները կրակել են ոստիկանների ուղղությամբ,ինչի արդյունքում մեկ ոստիկան սպանվել է, իսկ մյուսը վիրավոր է:

Նշենք նաև, որ սպանվածը ոստիկանության օպերատիվ բաժնի ոստիկան է եղել:

ՆԳՆ-ից Armlur.am-ին հայտնեցին, որ ոստիկանության Արմավիրի բաժնում տեղեկություններ են ստացվել, որ Արմավիրի մարզի Նալբանդյան համայնքի բնակիչներից մեկը զինված է։

Ըստ նախնական տվյալների՝ շուրջ մեկ ժամ առաջ, նշված անձին վնասազերծելու ընթացքում նա կրակոցներ է արձակել ոստիկանության ծառայողների ուղղությամբ։

Ոստիկանության մեկ ծառայող զոհվել է, մյուս ծառայողը տեղափոխվել է բժշկական կենտրոն։
Կտրվի լրացուցիչ տեղեկատվություն։

Ավելի վաղ shamshyan.com-ը գրել էր, որ հրազենային վնասվածքներով «Արմավիր» բժշկական կենտրոն են տեղափոխվել 2 քաղաքացիներ։Դեպքի վայր են ժամանել ՀՀ Ներքին գործերի նախարարության Ոստիկանության պետ, Ներքին գործերի նախարարի տեղակալ, ոստիկանության գեներալ-մայոր Արամ Հովհաննիսյանը, ՀՀ ՆԳՆ Ոստիկանության քրեական ոստիկանության պետ, ՀՀ ոստիկանության պետի տեղակալ Վարդան Վարդանյանը, քրեական ոստիկանության գլխավոր վարչության պետի առաջին տեղակալ Արմեն Պետրոսյանը, ՀՀ ՆԳՆ Ոստիկանության Պարեկային ծառայության պետ ՀՀ ոստիկանության պետի տեղակալ Արթուր Խուդինյանը, մեծ թվով ոստիկանության և պարեկային ծառայության աշխատակիցներ։

Պարզվել է, որ նշված անձինք հրազենային վնասվածքները ստացել են Նալբանդյան գյուղում։Գ. Շամշյանի տեղեկություններով՝ կան նաև օպերատիվ տեղեկություններ, որ հնարավոր է վիրավորների թիվը ավել լինի։Վիրավորների մեջ կան ոստիկանության ծառայողներ։Հաշվի առնելով հանցագործության վտանգավորության աստիճանը՝ դեպքի վայր են ժամանել Արմավիրի մարզի դատախազը և ՀՀ քննչական կոմիտեի Արմավիրի մարզային քննչական վարչության մեծ թվով քննիչներ՝ վարչության պետ Հրաչ Ղազարյանի գլխավորությամբ։