Աժ նախկին պատգամավորի փեսան 3 տարեկան երեխայի է վրաերթի ենթարկել. երեխայի կյանքը փրկել չի հաջողվել. ինչ են պատմում հարազատները

Սեպտեմբերի 14-ին ողբերգական դեպք է տեղի ունեցել Արմավիրի մարզում։ Ժամը 19:30-ի սահմաններում Արմավիրի բնակիչ 32-ամյա Արման Պ-ն, նախկին պատգամավոր, երջանկահիշատակ Հակոբ Հակոբյանի (Ճոյտ) եղբոր փեսան, իր վարած «ՎԱԶ 2121» մակնիշի ավտոմեքենայով Զվարթնոց գյուղի Թ. Թորոմոնյան փողոցում վրաերթի է ենթարկել Արմավիրի մարզի բնակիչ 3-ամյա Ռաֆիկ Մ-ին։

Ականատեսները ArmLur.am-ին պատմեցին, որ երեխան անճանաչելի էր դարձել:

Ողբերգությունից հետո, ցավոք, տարբեր մեկնաբանություններ ու շահարկումներ եղան, նույնիսկ ծնողական անուշադրության որակումներ:

Իսկ ինչպես է դեպքը տեղի ունեցել իրականում:

Նախ պետք է շեշտել, որ վերը նշված ժամանակահատվածում տարածքը մշտապես բազմամարդ է լինում:

Բնակիչները հաստատում են, որ այգին բարեկարգելուց հետո երեկոյան ժամերին այնտեղ երեխաների պակաս չի զգացվում:
ArmLur.am-ը տեղեկացավ, որ բնակելի այդ հատվածում թույլատրված է մեքենաների նվազագույն արագություն, իսկ ճանապարհի լայնքով թմբեր են կառուցված:

Դժբախտացած ընտանիքի տան և այգու միջև տարածությունը մի քանի մետր է. երեխաները մշտապես տանից այգի և այգուց տուն են վազվզում’ ընտանիքի որևէ մեծահասակ անդամի ուղեկցությամբ:

Այդ օրն էլ բացառություն չէր…

Մինչ փոքրիկի հորաքույրը ակնթարթորեն նկատել է արագ սլացող մեքենային, դեպի երեխան վազելով’ կանչել է, որ կանգնի, հորաքրոջ աչքի առաջ վարորդը հարվածել է երեքամյա փոքրիկին ու մի փոքր հատված առաջ շարժվել:

Ավելին, ArmLur.am-ին հայտնի դարձավ, որ քննությամբ արգելակների հետագիծ, արգելակման որևէ նշան չի հայտնաբերվել:

Թերևս պատճառը վարորդի հավաքած արագությունն է եղել, քանի որ հորաքույրը չի հասցրել կանգնեցնել երեխային ու կանխել դժբախտությունը…

Ականատեսները ArmLur.am-ին պատմեցին, որ վարորդը մեքենայում ուղևորի հետ է եղել, որն էլ մեքենայից շտապ իջել և գրկել է երեխային: Տեսնելով փոքրիկի այլափոխված գլուխը’ սարսափահար հետ է դրել գետնին, ապա օգնել է երեխային տեղափոխել «Վաղարշապատ» բժշկական կենտրոն:

Մինչ ԲԿ հասնելը՝ երեխան մահացած է եղել:

Քննության շահերից ելնելով’ վարորդի որոշ ինքնախոստովանական ցուցմունքներ չենք նշի, սակայն պետք է շեշտել, որ միայն շատ ուժեղ հարվածի դեպքում երեխան այդ աստիճան ծանր մարմնական վնասվածք կարող էր ստանալ: Թեև վարորդը հայտարարել է, թե իրեն թվացել է քար ընկավ մեքենայի անիվի տակ:

Հաշվի առնելով փոքրիկի հարազատների վիշտը’ այլ մանրամասներ չենք նկարագրում:

Հիշեցնենք,որ Shamshyan.com-ը գրել էր,որ սեպտեմբերի 14-ին մահվան ելքով վրաերթ է տեղի ունեցել Արմավիրի մարզում։ Ժամը 19:30-ի սահմաններում Արմավիրի մարզի բնակիչ 32-ամյա Արման Պ-ն իր վարած «ՎԱԶ 2121» մակնիշի ավտոմեքենայով Զվարթնոց գյուղի Թ. Թորոմոնյան փողոցում վրաերթի է ենթարկել Արմավիրի մարզի բնակիչ 3-ամյա Ռաֆիկ Մ-ին։

Քնար Մանուկյան