Հովիկ Աբրահամյանն իր խոստումը չկատարե՞ց

Ինչպես արդեն  տեղեկացրել էինք, մարտի 24-28-ը, ԱԺ-ում  կազմակերպվել էր  մոտ 30 նկարչի 40-50 կտավների  ցուցահանդես- վաճառք, որից գոյացած հասույթի մի մասը պետք է տրամադրվեր Գյումրու Ս. Մերկուրովի անվան գեղարվեստի դպրոցի վերականգնման ուղղելու նպատակով:

Ցուցահանդես-վաճառքը կազմակերպվել էր  «Շիրակ» հայրենակցական միության  աջակցությամբ: Ի վերջո, քանի պատգամավոր  է  կտավ գնել, պարզեց armlur.am լրատվականը` զրուցելով «Շիրակ» հայրենակցական միության ղեկավար Վարազդատ Ավոյանի հետ:

-Պրն Ավոյան, քանի՞  պատգամավոր է գնել  ԱԺ-ում ներկայացված կտավներից:

-Գնել են երկու  պատգամավոր ` Խաչատուր Քոքոբելյանն ու Արագած Ախոյանը, բայց դեռ հետաքրքրություն կա:

-Մոտավորապես քանի՞  պատգամավոր է ռեալ ցանկություն հայտնել նկարներ գնելու : 10, 20, 50…

-Դե եթե էդքան լինեին, էլ ինչ դարդ ունեինք (ծիծաղում է-խմբ.):

-Այսինքն, եթե անկեղծ խոսենք…

-Եթե անկեղծ խոսենք, ապա գլխավոր նպատակը Գյումրիի երաժշտական դպրոցի խնդիրը բարձրացնել էր օրենսդիրի մակարդակով, իհարկե, ցանկալի կլիներ, եթե գնեին:

-Հովիկ Աբրահամյանը խոստացել էր գնել 4000 դոլարանոց արժողությամբ կտավը: Տեր կանգնեց իր խոստմանը:

-Անկեղծ ասած, ես այդ մասին տեղեկացել եմ մամուլից:  Հետո ես իմացա, որ ինքը հետաքրքրվել է այդ նկարով, բայց խոսք չի տվել, որ կգնի: Պարզապես ինչքան գիտեմ ԱԺ-ն որպես կառույց գնել է Վալմարի կտավը:

-Փաստորեն, ինչպես սպասելի էր, պատգամավորների ճնշող մեծամասնությունը չգնեց ոչ մի նկար:

-Այո, ցավալի է, բայց փաստ է: Ես ակնկալում էի, որ գոնե ֆորմալ առումով կգնեին  գոնե մեկ նկար հանուն նկարչական դպրոցի: Գուցե նկարնե՞րն էին թանկ (Կտավների արժեքը  տատանվել է 200-4000 դոլարի սահմանում-խմբ.):

-Բայց մեր պատգամավորների մեծ մասը միայն աշխատավարձով չի ապրում, նրանց մեծ մասը նաև բիզնեսով է զբաղվում, հետևաբար 200-4000 դոլարն այդքան էլ մեծ գումար չէ:

-Եթե այդ հարթության վրա դիտարկենք, գուցե ձեր ասածը ճիշտ լինի, բայց չի բացառվում, որ նրանք կգնեին ավելի հայտնի նկարիչների գործերը, որոնք ցուցահանդեսում ներկայացված չէին:

-Կարելի՞ է եզրակացնել, որ ընդհանուր առմամբ քաղաքական էլիտայի ներկայացուցիչներն անտարբեր են արվեստի նկատմամբ:

-Ես այդպես չէի ասի, քանի որ ճանաչում եմ մարդկանց, որ արվեստի նկատմամբ ունեն լուրջ վերաբերմունք, բայց այլ բան է` բարոյապես գնահատականներ տալ, այլ բան է` ռեալ քայլեր անել:

Սոնա Դավթյան