Դպրոցների մոտ երեխաների առևանգման հարցով ահազանգ եղե՞լ է․ Ոստիկանությունը պարզաբանում է

Համացանցում տեղեկություններ են տարածվում՝ իբր Մալաթիա-Սեբաստիա վարչական շրջանում ինչ-որ մեկը դպրոցների մոտ երեխաներին նստեցնում է ավտոմեքենան և առևանգում։ Հրապարակումներում նաև նշվում է, թե բազմաթիվ ծնողներ այս հարցով ահազանգել են ոստիկանություն։

Տեղեկացնում ենք, որ նշված բովանդակությամբ ահազանգ կամ հաղորդում ՆԳՆ ոստիկանության օպերատիվ կառավարման կենտրոնում կամ Մալաթիայի բաժնում չի ստացվել։

Ոստիկանության Մալաթիայի բաժնի քրեական հետախուզության բաժանմունքում տեղեկություն է ստացվել, որ սեպտեմբերի 25-ին Մազմանյան փողոցի բնակիչ 57-ամյա մի տղամարդ «Մերսեդես» մակնիշի ավտոմեքենայով Շրջանային փողոցում փորձել է առևանգել երկու անչափահասի։

Նախաձեռնված քրեական վարույթի շրջանակներում տղամարդը հայտնաբերվել, ձերբակալվել և կազմված փաստաթղթերով ներկայացվել է քննչական բաժին: Ավտոմեքենան տեղափոխվել է բաժնի պահպանվող հատուկ տարածք:

Ավելի վաղ ArmLur.am-ը գրել էր․

«ArmLur.am-ի տեղեկություններով՝ օրերս երեխային առևանգել փորձող տղամարդը ձերբակալված է։

ArmLur.am-ին հասած լուրերի համաձայն՝ նա մոտեցել է երեխաներին, ասել է եկեք ձեզ տանեմ, բայց երեխաները չեն գնացել։

Առեւանգման փորձով կա ձերբակալված մեկ տղամարդ, ենթադրվում է, որ նա համացանցում տարածված լուսանկարի տղամարդն է։ Կատարվում է քննություն»։