ՏԵՍԱՆՅՈՒԹ․ Անձնական օգտագործման ի՞նչ ապրանքներ և որքա՞ն կարող եք ներմուծել Հայաստան առանց մաքսային վճարների

Պետական եկամուտների կոմիտեն հիշեցնում է առանց մաքսատուրքերի հարկերի վճարման տեղափոխման ենթակա ապրանքների թույլատրելի չափաքանակների մասին: Օդային ճանապարհով Հայաստան ժամանելիս ֆիզիկական անձինք, առանց մաքսային վճարների, ուղեկցող և (կամ) չուղեկցող ուղեբեռով կարող են տեղափոխել անձնական օգտագործման ապրանքներ, որոնց քաշը չի գերազանցում 50 կգ, արժեքը՝ 10 000 եվրոյին համարժեք դրամը, իսկ ցամաքային ճանապարհով ժամանելիս` 10 կգ և 200 եվրոյին համարժեք դրամը:

Ֆիզիկական անձի կողմից առանց մաքսային վճարների ներմուծվող անձնական օգտագործման ապրանքների թույլատրելի նորմերում չեն ներառվում ճամփորդության ընթացքում և (կամ) նշանակման վայրում անհրաժեշտ անձնական օգտագործման օգտագործված ապրանքները։ Իսկ անձնական օգտագործման ապրանքները՝ որպես այդպիսիք,  դիտարկում են մաքսային մարմինները՝ հաշվի առնելով՝ սեզոնայնությունը, ուղևորության նպատակը, ֆիզիկական անձի կողմից սահմանը հատելու հաճախականությունը, ինչպես նաև ապրանքի մաշվածությունը, պիտակների բացակայությունը, ներմուծվող ապրանքների քանակը և այլն։

Առանց մաքսային վճարների օդային և ցամաքային տրանսպորտով, ներառյալ՝ հետիոտն ճանապարհով, տեղափոխվող անձնական օգտագործման ապրանքների թույլատրելի չափաքանակները գերազանցելու դեպքում անհրաժեշտ է ներկայացնել ուղևորային մաքսային հայտարարագիր և վճարել մաքսային վճարներ գերազանցող մասի համար՝ արժեքից 30%-ի չափով, բայց ոչ պակաս, քան 1 կգ-ի դիմաց՝ 4 եվրոյին համարժեք դրամը։

Առանց մաքսատուրքերի հարկերի վճարման տեղափոխման ենթակա  ապրանքների թույլատրելի չափաքանակների մասին ուղեցույցը՝ այստեղ։

Մանրամասները՝ տեսանյութում։