Հանրային ծառայությունները կարգավորող հանձնաժողովի նախագահ Գարեգին Բաղրամյանն աշխատանքից ազատման դիմում է ներկայացրել

ՀԾԿՀ նախագահ Գարեգին Բաղրամյանն աշխատանքից ազատման դիմում է ներկայացրել Ազգային ժողովի նախագահին։

Այս մասին ArmLur.am-ի հետ զրույցում հաստատել է նրա մամուլի խոսնակ Լիանա Ազիզյանը։

Բաղրամյանն այդ պաշտոնին էր 2019 թ․-ից։ Այս տարվա փետրվարի 29-ին խորհրդարանը նրան վերընտրել էր նույն պաշտոնում։

Հիշեցնենք, որ այսօր «Ժողովուրդ օրաթերթը»-ը գրել էր. «ՔՊ-ականները շարունակում են իրենց արշավը՝ ընդդեմ ռուսաստանաբնակ հայ գործարար, «Տաշիր» ընկերությունների խմբի նախագահ Սամվել Կարապետյանի: Իշխանականներն ամեն ջանք գործադրում են, որպեսզի նրա ձեռքից խլեն «Հայաստանի էլեկտրական ցանցերը»:

Նախ՝ ՔՊ խմբակցությունն էր ԱԺ-ում լսումներ նախաձեռնել էլեկտրաէներգիայի մատակարարման խնդիրների հետ կապված. Հայկ Կոնջորյանի նախաձեռնությամբ նման նիստ հրավիրվեց, որը աննախադեպ էր, և ակնհայտ էր, որ այն ոչ թե միտված է խնդիրներին լուծում գտնելուն, այլ որպեսզի լսումների ընթացքում ՔՊ-ն ամեն գնով ցույց տա, թե ինչքան վատ է աշխատում ՀԷՑ-ը:

Երեկ էլ արդեն Նիկոլ Փաշինյանի գլխավորությամբ տեղի է ունեցել խորհրդակցություն, որի ընթացքում դարձյալ քննարկվել են էլեկտրաէներգիայի մատակարարման որակի հետ կապված խնդիրները:

Այսինքն՝ ՔՊ-ն այնքան լուրջ է տրամադրված ՀԷՑ-ը խլելու հարցում, որ անգամ Նիկոլ Փաշինյանն է հրապարակավ գործի անցել:

ՔՊ-ականներն իրենց այս ճնշումներով, ըստ էության, դուրս են եկել ոչ միայն Սամվել Կարապետյանի դեմ, այլ «ատամ» են ցույց տալիս ռուսական կողմին ու փորձում են ուղերձ հղել, որ ազատվում են ռուսական կապիտալից:

Նիկոլ Փաշինյանին, հավանաբար, զայրացրել է նաեւ այն, որ սեպտեմբերի 28-ին տեղի ունեցած Մյուռոնօրհնության սուրբ արարողության կնքահայրը հենց տիար Սամվել Կարապետյանն էր»

Փաստացի, ՀԷՑ-ի ճնշումները գործադրվել նաև ՀԾԿՀ նախագահ Գարեգին Բաղրամյանի վրա, ինչի պատճառով էլ ստիպված նա ազատման դիմում է գրել: