ՊԱՏԳԱՄԱՎՈՐԻՆ ԿԱՇԱՌՔ ՏԱԼՈՒ ԳՈՐԾԸ ԳԼԽԱՎՈՐ ԴԱՏԱԽԱԶԻ ՍԵՂԱՆԻՆ Է

ՔՊ պատգամավորին կաշառք տալու գործը գլխավոր դատախազի սեղանին է. ի՞նչ կորոշվի

Իշխանական «Քաղաքացիական պայմանագիր» խմբակցության պատգամավոր Հովիկ Աղազարյանին կաշառք տալու գործով ՀՀ քաղաքացի Աշոտը մեղադրյալի աթոռին է հայտնվել, իսկ պատգամավորը անպատիժ է մինչ օրս:

«Ժողովուրդ» օրաթերթի բացառիկ տեղեկությունների համաձայն` ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանի դեմ հակակոռուպցիոն կոմիտեում ցուցմունք են տվել, համաձայն որի՝  նա 300 հազար ԱՄՆ դոլար կաշառք է ուզել, որ Հայաստանից, սահմանված ընթացակարգերի խախտմամբ, առանց խոչընդոտների, մանր եղջերավոր անասուններ արտահանեն Արաբական Միացյալ Էմիրություններ։

«Ժողովուրդ» օրաթերթը իր իրազեկ աղբյուրներից տեղեկացավ, որ ՔՊ պատգամավորի դեմ ցուցմունք տված անձին՝ Աշոտին, հակակոռուպցիոն կոմիտեն մեղադրանք է առաջադրել ՔՊ պատգամավոր Հովիկ Աղազարյանին կաշառք փոխանցելու շուրջ պայմանավորվածություն ձեռք բերելու համար, նրա նկատմամբ ընտրված է խափանման միջոց՝ երկրից չբացակայելու արգելքը. սակայն պատգամավոր Աղազարյանին մեղադրանք առաջադրված չէ։

Հիմա ՀՀ հակակոռուպցիոն կոմիտեն սպասում է ՀՀ գլխավոր դատախազ Աննա Վարդապետյանի որոշմանը, միգուցե դատախազն էլ իր հերթին սպասում է ՀՀ վարչապետ Նիկոլ Փաշինյանի քաղաքական հրահանգին, որպեսզի մտնի ԱԺ եւ Աղազարյանին պատգամավորական անձեռնմխելիությունից զրկի եւ մեղադրանք առաջադրի նաեւ կաշառք պահանջողի կամ դրա շուրջ պայմանավորվածություն ձեռք բերող անձի նկատմամբ:

Այս աղմկահարույց գործով «Ժողովուրդ» օրաթերթին առավել ուշագրավ հանգամանքներ հայտնի դարձան. մասնավորապես, որ պատգամավոր Հովիկ Աղազարյանի դեմ ցուցմունք տված անձը՝ Աշոտը, պատմել է իրավապահներին, որ 300 հազար ԱՄՆ դոլար կաշառքը չեն կարողացել տալ ու վերջում պայմանավորվել են 100 հազար դոլար տալ Աղազարյանին։ Գնացել, հանդիպել են նրան ՀՀ Ազգային ժողովին հարակից զբոսայգում, եւ հենց այնտեղ 20 հազար դոլար է առաջարկվել Աղազարյանին, սակայն պատգամավորը զայրացել է ու ասել, թե՝ «պայմանավորվել էինք 100 հազար ԱՄՆ դոլար, ինչո՞ւ եք քիչ բերել, չեմ վերցնում»: Առաջարկել է՝ «կգնաք, կավելացնեք նոր կգաք»։

«Ժողովուրդ» օրաթերթը այս տեղեկությունների վերաբերյալ զրուցեց ԱԺ ՔՊ խմբակցության պատգամավոր Հովիկ Աղազարյանի հետ:

-Պարո՛ն Աղազարյան, Աշոտ անունով անձին մեղադրանք են առաջադրել այն բանի համար, որ Ձեզ կաշառք է տվել, ու հակակոռուպցիոն կոմիտեում կա քրեական վարույթ: Այս քրեական գործի շրջանակում Ձեզ հարցաքննության հրավիրե՞լ են:

– Այո, հրավիրել են:

-Դուք անձամբ գնացել ու հարցաքննվե՞լ եք:

-Այո:

-Ի՞նչ եք պատմել այնտեղ. Աշոտն ասում է, որ Ձեզ հետ պայմանավորվել է՝ Ձեզ 300 հազար դոլար կաշառք տալու շուրջ, որ սահմանված ընթացակարգերի խախտմամբ կարողանան մանր եղջերավոր անասուններ արտահանեն էմիրատներ:

-Խոսքը 300 հազար դոլարի մասին չէ, 200 հազար դոլարի մասին է շոշափվել:

-Այսինքն՝ 200 հազա՞ր դոլար եք ուզել:

-Ոչ, դա մի քիչ ուրիշ կերպ է եղել, երկար պատմություն է:

-Մի փոքր մեզ ներկայացրեք այդ պատմության մասին: Դուք Աշոտին գիտե՞ք, տեսե՞լ եք:

-Այո, գիտեմ, մեկ անգամ հանդիպել եմ: Հանդիպել եմ մի քիչ ինձ երկար ծանոթ մարդու միջոցով, ենթադրում եմ, որ հանդիպածս մարդն Աշոտն է:

-Ձեր այդ «երկար ծանոթը» Սլավի՞կն է։

-Այո: Սլավիկը Աշոտի հետ հանդիպումից առաջ եկավ, ասաց՝ խնդիր կա: Ես այդ ժամանակ գտնվում էի ընկերներիս հետ, ինչ-որ միջացառման էինք, երկար չխոսեցի ու ասացի՝ հետո կզրուցենք: Բնականաբար, հետո հանդիպեցինք, Աշոտն էլ կար այդ ժամանակ, ու ասացի նրանց՝ «Ձեր ասածները ոչ մի հիմք ու հենք չունեն, ձեր  քայլերը կարող եք անել ինչպես որ կարգն է»։ Հետո այդ շրջանում իրավապահ մարմինները մեկ այլ գործ էին քննում:

-Խոսքը կեղծ վարորդական իրավունքի քրեական գործի մասի՞ն է: Մեզ հասած տեղեկությունն

երի համաձայն՝ հակակոռուպցիոն կոմիտեն կեղծ վարորդական իրավունքի գործ է քննել ու գաղտնալսումներով բացահայտվել են Ձեր կաշառքի մասին խոսակցությունները :

-Ո՛չ, իմ խոսակցությունները չկան: Ես չգիտեմ, բայց ենթադրում եմ՝ Սլավիկի եւ Աշոտի խոսակցություններն են նրանք լսել, որտեղ այդ թվերը շոշափվել են:

– Բայց տեղեկություններ կան, որ անձամբ Ձեր խոսակցությունը կա:

– Չկա նման բան, քանի որ նման խոսակցություն չի եղել, հետեւաբար չի կարող լինել նաեւ ձայնագրություն:

-Այսինքն՝ Դուք 300 հազար դոլարի կաշառք կամ, ինչպես դուք եք ասում, 200 հազար դոլարի կաշառք չե՞ք ուզել:

– Իհարկե՝ ոչ , այդպիսի խոսակցություն չի եղել:

– Այդ դեպքում, պարո՛ն Աղազարյան, Աշոտին ինչո՞ւ են կաշառք տալու համար մեղադրանք առաջադրել ու նա ամիսներ շարունակ է՝ մեղադրյալի կարգավիճակում է:

-Ես տեղյակ չեմ այդ մասին…Աշոտին մեղադրա՞նք է առաջադրվել:

-Նրան մեղադրանք է առաջադրվել կաշառքի համար:

-Ուրեմն, տվել է, ենթադրենք, թե Սլավիկին, որ Սլավիկն էլ տա ինձ:

-Ձեզ հետ հանդիպման ԱԺ չե՞ն եկել:

– Ո՛չ։

– Աշոտը պատմել է իրավապահներին, որ 300 հազար դոլար կաշառքը չեն կարողացել տալ ու վերջում պայմանավորվել են 100 հազար դոլար տալ Ձեզ։ Արդյունքում, հանդիպել եք ու 20.000 դոլար են առաջարկել, սակայն Դուք զայրացել եք ու ասել, որ՝ «պայմանավորվել էինք 100 հազար դոլար»։

-Իհարկե՝ ոչ, Ազգային ժողով իրենք չեն եկել, երբեւէ Սլավիկը ԱԺ չի մտել: Աշոտին էլ տեսել եմ մեկ անգամ, ու վերջ: Դա իրենց մեջ ինչ-որ ներքին խժդժություն է. դե քննությունը կպարզի, բնականաբար, հո ասելով չէ՞, որ Աղազարյան Հովիկը այդքան կաշառք է ուզել:

-Գաղտնալսումներ կան, ձայնագրություններ կան։

-Չի կարող գաղտնալսում լինել մի բանի, որը չի եղել, այդ թեմաներով չենք խոսել իրենց հետ:

-Այդ դեպքում, ինչո՞ւ է Աշոտը Ձեր անունը տալիս:

-Հիմա, եթե ինչ-որ մեկը Աշոտի հետ խոսել է հեռախոսով ու ասել է, որ Աղազարյան Հովիկը 200 հազար դոլար փող է ուզում, որ մեզ օգնի, Աշոտն էլ ասել է՝ շատ է եւ այլն…. ու հետո, ենթադրելի է ըստ լոգիկայի, որ 20 հազար դոլար է տվել, նա էլ ասել է՝ չէ Աղազարյանը Հովիկը չի համաձայնում, գոնե պետք է 100 հազարը տանք: Ենթադրենք՝ սա է, բնականաբար, այստեղ հանցակազմ կա, ոնց կարող է, որ իրավապահ մարմինները խոսակցություն լսեն, որտեղ շոշափվում է ԱԺ պատգամավորի անուն, ու ընթացք չտան:

-Հասանք կարեւոր հարցին. իրավապահները դիմել են Գլխավոր դատախազին եւ սպասում են Գլխավոր դատախազի գործողություններին:

-Ի՞նչ գործողությունների են սպասում:

-Գան Ազգային ժողով՝ Ձեզ զրկեն անձեռնմխելիությունից ու մեղադրանք առաջադրեն:

– Ինձ կանչում են, ես չե՞մ գնում. երբ կանչել են՝ գնացել եմ։

– Տարօրինակ է մեկ հանգամանք՝ ինչո՞ւ պետք է Աշոտը կամ Սլավիկը Ձեր անունը տային կաշառքի դեպքով, եւ որ Դուք եք կաշառք ուզել։

-Այդ հարցն ինձ քննիչն էլ է տվել, ու ես ասեցի, որ հարցին չեմ պատասխանի, քանի որ դրա պատասխանը գիտեք:

Դուք էլ, եթե երկար մտածեք, կիմանաք, եթերը կփակեք՝ կասեմ:

-Ինչո՞ւ, հիմա ասեք:

-Ո՛չ, նախաքննական գաղտնիք է, չեմ կարող ասել:

-Այն, ինչ մեզ ասացիք, նույնը հակակոռուպցիոն կոմիտեո՞ւմ եք ասել:

-Ես այնտեղ ավելի շատ բաներ եմ պատմել, թե այս պատմությունը որտեղից կարող է առաջացած լինել, եւ այլն: Ամեն ինչ պատմել եմ:

Նախաքննական գաղտնիք կա՝ չեմ կարող շատ բան հայտնել:

Միլիարդավոր դրամների պետական գնումներ են արվել ԱԺ նախկին պատգամավոր Մհեր Սեդրակյանի որդուն՝ Ազգային Ժողովի «Հայաստան» խմբակցության նախկին պատգամավոր Դավիթ Սեդրակյանին պատկանող «Բիդեք» ՍՊԸ-ից։

2024 թվականի հունվարի 1-ից մինչեւ հոկտեմբերի 14-ը «Բիդեք» ՍՊԸ-ի եւ մի քանի գերատեսչությունների միջեւ 7 պայմանագիր է կնքվել, այդ թվում՝ ՀՀ կրթության, գիտության, մշակույթի եւ սպորտի նախարարության, «Հայկական ատոմային էլեկտրակայան» ՓԲԸ-ի, ՀՀ քաղաքաշինության կոմիտեի, ՀՀ տարածքային կառավարման եւ ենթակառուցվածքների նախարարության, Հայաստանի տարածքային զարգացման հիմնադրամի հետ։

«Ժողովուրդ» օրաթերթը պաշտոնական աղբյուրներից պարզեց, որ պայմանագրերի ընդհանուր արժեքը կազմել է գրեթե 4 միլիարդ դրամ եւ ավելի։ Հենց այս ընկերությունն է, որ ստանձնել է Հայոց ցեղասպանության հուշահամալիրի եւ թանգարանի հիմնանորոգման եւ բարեկարգման աշխատանքների կատարումը։ Այս ծառայությունը մատուցելու համար Դավիթ Սեդրակյանի ընկերությանը տրամադրվել է 743 մլն ՀՀ դրամ։

Մանրամասնենք, որ Սեդրակյանի «Բիդեք» ՍՊԸ-ի եւ «Հայկական ատոմային էլեկտրակայան» ՓԲԸ-ի միջեւ կնքված պայմանագիրն արժեցել է 844 մլն 937 հազար դրամ, նպատակը՝ ««ՀԱԷԿ» ՓԲԸ կարիքների համար պահեստային ճգնաժամային կենտրոնի կառուցման աշխատանքներ»։

«Բիդեք» ՍՊԸ-ի եւ ՀՀ կրթության, գիտության, մշակույթի եւ սպորտի նախարարության միջեւ կնքված պայմանագրի արժեքը կազմել է 431 մլն 980 հազար դրամ, նպատակը՝ «կրթական օբյեկտների հիմնանորոգում (Երեւանի թիվ 8 արհեստագործական պետական ուսումնարանի հիմնանորոգման 2024 թ. աշխատանքներ)»։

«Բիդեք» ՍՊԸ-ի եւ ՀՀ քաղաքաշինության կոմիտեի միջեւ կնքված պայմանագրի արժեքը կազմել է 9 մլրդ 410 մլն դրամ, նպատակը՝ «ՀՀ Լոռու մարզի Ստեփանավան համայնքի Աշոտաբերդ թաղամասի կառուցապատման աշխատանքի» մատուցում։

«Բիդեք» ՍՊԸ-ի եւ ՀՀ տարածքային կառավարման եւ ենթակառուցվածքների նախարարության միջեւ կնքված պայմանագիրն արժեցել է 438 մլն 822 հազար դրամ, նպատակը՝ «կամուրջի հիմնանորոգման աշխատանքների» մատուցում։

«Բիդեք» ՍՊԸ-ի եւ Հայաստանի տարածքային զարգացման հիմնադրամի միջեւ կնքված պայմանագիրն արժեցել է 2 մլրդ 964 մլն դրամ, նպատակը՝ «ՀՀ Արագածոտնի մարզի ք. Աշտարակի Վ. Պետրոսյանի անվ. հիմն. դպրոցի կառուցման աշխատանքների» մատուցում։

«Բիդեք» ՍՊԸ-ի եւ Հայաստանի տարածքային զարգացման հիմնադրամի միջեւ կնքված մյուս պայմանագրի արժեքը կազմել է 1 մլրդ 91 մլն դրամ, նպատակը՝ «ՀՀ Արարատի մարզի Լուսաշող բնակավայրի կրթահամալիրի կառուցման» աշխատանքների» մատուցում։

Պայմանագրերը կնքվել են հրատապ բաց մրցույթի կամ բաց մրցույթի ընթացակարգով՝ այսինքն՝ առանց մրցակցության։

«Կրթական ծրագրերի կենտրոն» ԾԻԳ պետական հիմնարկի վերջին 10 տարիների գլխավոր հաշվապահ, այժմ ԿԳՄՍՆ գլխավոր քարտուղար Հասմիկ Հակոբյանի ամուսինը՝ Վարդան Սարգսյանը, մի քանի ընկերություններում աշխատելով, պետությանը հասցրել է գրեթե 35-40 մլն դրամի վնաս։ Կնոջ գործոնով պայմանավորված՝ այդ մասին որեւէ պաշտոնական հայտարարություն չի հնչել, ամեն բան կոծկվել է, իսկ պատիժը եղել է ընդամենը հասցված վնասի վերականգնումը: Ընկերության աշխատանքի պատճառով հասցված վնասը եղել է 2013-2022 թվականներին։ Համաձայն Վարդան Սարգսյանի հայտարարագրի՝ նա երեք ընկերություններից ստացել է աշխատանքի վարձատրություն՝ «ՖԻՇՄԵՆ ԻՄՊՈՐՏ», «ԱՐՏՖԱՐՄ», «ՔԼԵՎՐ ՏԵՔ» ընկերություններից՝ համապատասխանաբար 4 մլն 200 հազար, 312 հազար դրամ եւ 510 հազար դրամ։ Ընկերությունները պատկանում են 3 տարբեր անձանց։ «Ժողովուրդ» օրաթերթի տեղեկությունների համաձայն՝ այս չարաշահման վերաբերյալ քրեական վարույթ կա նախաձեռնված, իսկ Վարդան Սարգսյանը որպես մեղադրյալ է ներգրավված եղել այս գործում։ Սարգսյանը անգամ խոստովանել է, որ չարաշահում է թույլ տվել, վնասը փոխհատուցվել է, ինչի պատճառով այս գործը ծածկադմփոց են արել ու կոծկել, քանի որ Հասմիկ Հակոբյանը ԿԳՄՍ նախարար Ժաննա Անդրեասյանի ընկերուհիներից է եւ վաղեմի գործընկերը՝ դեռ ԾԻԳ-ում աշխատելու ժամանակահատվածից: Այս պատճառով ծածկել են գործը, եւ որեւէ իրավական կառույց պաշտոնական հայտարարություն չի տարածել հիշյալ չարաշահման գործով։ Այժմ էլ Հասմիկ Հակոբյանը ԿԳՄՍՆ-ում համարվում է Անդրեասյանի աջ ձեռքը. բոլոր ֆինանսական հարցերը լուծվում են Հակոբյանի միջոցով: Զուգահեռ սրան նշենք, որ եթե նախկին իշխանությունից որեւէ մեկը նման չարաշահումների էպիկենտրոնում հայտնվեր, ներկայիս իշխանությունը կթմբկահարեր այդ մասին բոլոր հնարավոր հարթակներում։

Ճամբարակ համայնքի Շողակաթ բնակավայրի (նախկին Շորժա) Սեւանա լճի լողափնյա տարածքում հանրապետությունում լողի մասսայականացման եւ առողջ ապրելակերպի քարոզման նպատակով օգոստոսի 17-ին անցկացվեց «ՀՀ վարչապետի գավաթ» սիրողական լողի մրցաշարը։ Այս քարոզչությունը մեր երկրի աղքատիկ բյուջեի վրա արժեցել է 20 մլն 114 հազար ՀՀ դրամ: «Ժողովուրդ» օրաթերթը տեղեկացավ, որ Լողի մրցաշարի համար ՀՀ կրթության, գիտության, մշակույթի եւ սպորտի նախարարությունը տրամադրել է 20 մլն 114 հազար դրամ՝ գրեթե 52 հազար դոլար։ Եղել են դրամական մրցանակներ երկու տարիքային խմբերի, 1-10-րդ տեղեր գրաված մասնակիցների համար՝ «1-ին տեղ՝ 1.000.000 ՀՀ դրամ, 2-րդ տեղ՝ 500.000 ՀՀ դրամ, 3-րդ տեղ՝ 300.000 ՀՀ դրամ, 4-րդ տեղ՝ 100.000 ՀՀ դրամ, 5-10-րդ տեղ՝ 50.000 ՀՀ դրամ»։ Նշենք, որ հարկերը, տուրքերը եւ պարտադիր վճարները ներառված չեն: Կնքված պայմանագրերի տպագրված գովազդային նյութերի, մարզաշապիկների, հուշանվերների, հուշամեդալների եւ հավաստագրերի եւ այլ իրերի համար հատկացվել է 2 մլն 236 հազար դրամ։ Մրցաշարի անցկացման, պարգեւատրման անցկացման, տեսահոլովակի առկայության, հեռարձակման ապահովման համար վճարվել է 16 մլն 872 հազար դրամ։