Վենետիկում կրկնապատկել են մեկօրյա այցի վճարը և վճարովի մուտքի օրերի թիվը

Վենետիկի մուտքի տոմսի գինը 2025 թվականին կբարձրանա՝ 5 եվրոյից հասնելով 10 եվրոյի նրանց համար, ովքեր այցելությունն ամագրում են վերջին պահին։ Բացի այդ, գրեթե կկրկնապատկվի այն օրերի թիվը, որոնց ընթացքում զբոսաշրջիկները պետք է վճարեն մուտքի համար։

Այս մասին հաղորդում են մի շարք լրատվամիջոցներ՝ վկայակոչելով Վենետիկի քաղաքապետին։

2025 թ. ապրիլից կսկսվի քաղաք փորձնական վճարովի մուտքի նոր շրջանը։ Ընթացիկ տարվա համեմատ այդ ժամանակահատվածը գրեթե կկրկնապատկվի՝ 29-ից հասնելով 54 օրվա, իսկ տոմսի գինը կբարձրանա մինչև 10 եվրո, եթե զբոսաշրջիկն այն պատվիրի այցելությունից չորս օրից պակաս ժամանակամիջոցում։

Վճարովի օրերը, ինչպես հայտարարել է քաղաքապետարանը, բաժին են ընկնում զբոսաշրջիկների ամենամեծ հոսքի ամիսների՝ մայիսի, հունիսի և հուլիսի որոշակի օրերին (շաբաթ և կիրակի օրեր, արձակուրդներ, տոներ)։ Վճարը, որի սահմանման որոշումը կայացվել է դեռևս 2019 թվականին, վերաբերում է միայն նրանց, ովքեր Վենետիկ են ժամանում մեկ օրով՝ առավոտից մինչև երեկո։ Նրանք, ովքեր մնում են գիշերելու, վճարում են լրացուցիչ տուրիստական ​​հարկ, որի չափը կախված է հյուրանոցի մակարդակից։

Անվճար Վենետիկ կթողնեն մինչև 14 տարեկան երեխաներին՝ նույնիսկ մեկօրյա այցի դեպքում, ինչպես նաև զանազան համաժողովների և սպորտային մրցումների մասնակիցներին։ Իսկ առանց տոմսի այցելուներին կտուգանեն:

Վենետիկը՝ Իտալիայի ամենաշատ այցելուներ ունեցող քաղաքներից մեկը, համարվում է «մահացող քաղաք»։ Բնակիչների թիվն անցյալ դարի կեսերից զգալիորեն նվազել է, շատ վենետիկցիներ հեռացել են՝ վաճառելով իրենց տները կամ փոխել են իրենց գործունեության բնույթը և սկսել զբոսաշրջիկների ընդունել։ Նրանք, ովքեր մնացել են քաղաքում, դժգոհում են զբոսաշրջիկների ճնշող բազմությունից: