ԿԱՂՈԹԵՆ ՀԱՅ ԳԵՐԻՆԵՐԻ ՀԱՄԱՐ

Ամենայն Հայոց Կաթողիկոսը կոչ է հղել աշխարհի բոլոր մարդկանց միանալ նոյեմբերի 10-ին հայ գերիների համար կազմակերպվող աղոթքին։

«Մենք վստահ ենք, որ Եկեղեցիների համաշխարհային խորհուրդի կողմից նախաձեռնած ընդհանրական աղոթքը կխթանի քրիստոնեական համայնքների, դիվանագիտական առաքելությունների, լրատվամիջոցների եւ միջազգային համապատասխան բոլոր կազմակերպությունների մասնակցությունը։

…Անկեղծորեն հույս ենք տածում, որ այս հոգեւոր ջանքերը կբարձրացնեն համաշխարհային իրազեկությունը շարունակվող հումանիտար ճգնաժամի վերաբերյալ եւ իրենց նպաստը կբերեն ճշմարտության ու արդարության վրա հիմնված խաղաղարար լուծմանը»,-նշել է Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսը։

Արձագանքելով այս կոչին՝ Եկեղեցիների համաշխարհային խորհուրդը (ԵՀԽ) հրավիրում է նոյեմբերի 10-ին՝ Ադրբեջանում կազմակերպվող COP29 կլիմայական գլոբալ գագաթնաժողովի նախօրեին, բոլոր բարի կամքի տեր մարդկանց միանալու Հայաստանին նվիրված աղոթքի օրվան՝ հանուն խաղաղության հաստատման, փախստականների աջակցության եւ գերիների ազատ արձակման։

2020թ. սեպտեմբեր-հոկտեմբեր ամիսներին Արցախի դեմ իրականացված ռազմական ագրեսիան, դրան հաջորդած Լաչինի միջանցքի տասնամսյա շրջափակումը եւ 2023թ. սեպտեմբերին շուրջ 120.000 հայերի տեղահանումը իրենց հայրենի երկրից մնում է հրատապ խնդիր։

Ն.Ս.Օ.Տ.Տ. Արամ Ա Մեծի Տանն Կիլիկիո Կաթողիկոսը եւս միացել է աղոթքի օրվա կոչին։

«Կոչ ենք անում բոլոր կրոնական համայնքներին, միջազգային կառույցներին եւ բարի կամքի տեր մարդկանց միանալ մեր աղոթքին՝ միաժամանակ զորացնելով ջանքերը պահանջելու համար բոլոր հայ գերիների անհապաղ եւ անվերապահ ազատ արձակումը Բաքվից։

…Մենք հիշեցնում ենք COP29 գագաթնաժողովին մասնակցող միջազգային հանրությանը, որ արդարությունը եւ խաղաղությունը սերտորեն փոխկապակցված են եւ չի կարելի իրարից զատել։ Մենք չենք կարող պահանջել կլիմայական արդարություն՝ առանց դատապարտելու մարդու իրավունքների խախտումները»,-նշել է Արամ Ա Մեծի Տանն Կիլիկիո Կաթողիկոսը։

ԵՀԽ արձանագրում է, որ COP29-ը եզակի հնարավորություն է, որպեսզի կոչ արվի 23 հայ գերիների, ինչպես նաեւ Ադրբեջանի բանտերում գտնվող ադրբեջանցի քաղաքական բանտարկյալների եւ լրագրողների անվերապահ ազատմանը։

ԵՀԽ-ի նախագահ Բ. Դոկտոր Հայնրիխ Բեդֆորդ-Շտրոմը՝ ընդգծելով, որ Հայաստանը կարիքն ունի մեր աղոթքների, մասնավորաբար ասել է. «Քրիստոնեական հավատքը ուղեկցել է հայ ժողովրդին Հայ Առաքելական Եկեղեցու հիմնադրումից ի վեր՝ 301 թվականից… Ապագան անորոշ է»։

Բեդֆորդ-Շտրոմն նշել է, որ Աստված կառաջնորդի հայ ժողովրդին, եւ մենք կարող ենք միանալ Աստծուն մեր աղոթքներով. «Մեր աղոթքները կհասնեն նրանց սրտերին եւ հոգիներին ու կզորացնեն նրանց»։

ԵՀԽ-ի գլխավոր քարտուղար Ռ. Պրոֆ. Դոկտոր Ջերի Պիլայը կոչ է արել բոլոր եկեղեցիներին միանալ աղոթքին եւ դիմել միջազգային հանրությանը շարունակելու աջակցության ցուցաբերումը։

«Մենք մնում ենք աղոթական համերաշխության մեջ Հայ Առաքելական Եկեղեցու եւ Հայաստանի էկումենիկ գործընկերների հետ»,-ասել է Դոկտոր Ջերի Պիլայը՝ վերահաստատելով իրենց կոչն ուղղված արդար եւ կայուն խաղաղության՝ միջազգային հումանիտար եւ մարդու իրավունքների օրենքներին համապատասխան։

ԵՀԽ-ն նոյեմբերի 10-ին՝ Ժնեւում, ժամը 17:00-ին Սուրբ Պետրոսի տաճարում կկազմակերպի մասնավոր աղոթքի արարողություն՝ հայ համայնքի հետ համագործակցաբար։

Բարեգութ Աստված, դիմում ենք քեզ հայ ժողովրդի համար։

Շնորհակալություն ենք հայտնում այն բոլոր շնորհների համար, որոնցով օրհնել ես նրանց. ամուր հավատքով, հոյակերտ եկեղեցիներով, ոգեշունչ արարողություններով, արվեստի եւ մշակույթի բնագավառում բացառիկ տաղանդներով, ինչպես նաեւ տոկունությամբ՝ հաղթահարելու պատմության ընթացքում բոլոր մարտահրավերները։

Քեզ ենք ներկայացնում այն ցավը, որը մռայլեցնում է նրանց կյանքը այս օրերին, ռազմական ագրեսիայի զոհ դարձած սիրելիների համար հոսող արցունքները, նրանց անորոշությունն ու մտավախությունն ապագայի հանդեպ, ովքեր ստիպված էին լքել իրենց տները եւ պատերազմում ավերված սրբազան եկեղեցիների կորուստը։

Դու աշխարհի լույսն ես։ Առաքիր քո լույսը բոլոր տառապող սրտերին ու կրկին ու կրկին ոգեշնչիր նրանց հավատքի, սիրո եւ հույսի քո ոգով»։

«ՄԵՐ ՕՐԱԿԱՐԳՈՒՄ ԼՂ ՀԻՄՆԱՀԱՐՑ ՉԿԱ». ՄԻՐԶՈՅԱՆ

«Ինչպես արդեն ասել եմ՝ ՀՀ արտաքին գործերի նախարարության թիվ մեկ առաջնահերթությունը ՀՀ շուրջ խաղաղության եւ կայունության ապահովումն է, սրա ուղղությամբ են մեր ջանքերը գործադրվում, ինչը ենթադրում է նաեւ Ադրբեջանի հետ հարաբերությունների կարգավորման գործընթաց»:

Այս մասին ԱԺ-ում 2025 թվականի բյուջեի նախագծի նախնական քննարկման ժամանակ ասաց ԱԳ նախարար Արարատ Միրզոյանը՝ պատասխանելով «Հայաստան» խմբակցության պատգամավոր Արմեն Ռուստամյանի հարցին՝ արդյոք Արցախյան հակամարտության կարգավորման հարց ԱԳՆ օրակարգում կա:

«Ադրբեջանի հետ հարաբերությունների կարգավորումն ունի մի քանի նյութական արտահայտություն՝ խաղաղության պայմանագրի տեքստի վերջնականացում ու ստորագրում, ենթակառուցվածքների ապաշրջափակում, սահմանների սահմանազատման գործընթաց, իսկ  ԼՂ հակամարտություն երբ ասում եք, մենք հասկանում ենք ամբողջ կոնֆլիկտը», – ասաց նա:

ԱԳՐԱՐԱՅԻՆՈՒՄ ԲՈՂՈՔԻ ԱԿՑԻԱ Է ԻՐԱԿԱՆԱՑՎԵԼ

Ագրարային համալսարանում դասախոսները գործադուլ եւ բողոքի ակցիա են իրականացրել՝ ԿԳՄՍ նախարարությունից աջակցություն չստանալու պատճառաբանությամբ՝ ասելով, որ նախարարությունը լիցենզիա չի տրամադրում բուհում ներդրվող նոր կրթական ծրագրերի համար։

Դասախոսները եւ ամբիոնի վարիչները դեմ են ԿԳՄՍ նախարար Ժաննա Անդրեասյանի այն որոշմանը, որ Ագրարային համալսարանի 2-րդ մասնաշենքը պետք է տրվի Ֆրանսիական համալսարանին։ Նշված մասնաշենքում այժմ Ագրարային համալսարանի ուսանողների դասապրոցեսն է ընթանում, շենքը շահագործվում է։

ԷՄՄԱ ՄԻՔԱՅԵԼՅԱՆ

ՎԵՐԱԴԱՐՁԻ ՊԱՀԱՆՋՈՎ

Այսօր՝ ժամը 14:00-ին, Բաքվի բանտերում ապօրինաբար պահվող հայ ռազմագերիների, քաղաքացիական անձանց, այդ թվում՝ Արցախի ռազմաքաղաքական ղեկավարության ազատ արձակման պահանջով տեղի կունենա բողոքի ակցիա, հայտնում է Արցախի տեղեկատվական շտաբը:

«Բողոքի ակցիան կմեկնարկի ՄԱԿ-ի գրասենյակի առաջ, որից հետո մասնակիցների երթը կշարժվի դեպի ՀՀ արտաքին գործերի նախարարություն եւ ՀՀ-ում գործող ԵԱՀԿ Մինսկի խմբի համանախագահ երկրների դեսպանատներ»,- ասվում է հաղորդագրության մեջ։