«Տիգրան Սարգսյանը մեր ատենապետին 2009-ին առանց ամաչելու առաջարկեց, որ ինքը դառնա կուսակցության ատենապետ, եւ հայտարարեց, որ ՀՌԱԿ-ը գանձ է: Դրանից հետո սկսվեց պայքարը դեսպանատների, ուղարկված էմիսարների միջոցով, երբ ամեն ինչ անում էին, որ Հորդանանի մեր համագումարը չլինի: Վերջը տենց պատմություններ կան, էլի»,-իր եւ Տիգրան Սարգսյանի երկարամյա հակամարտության նախապատմությունը ներկայացրեց ՀՌԱԿ ատենապետ Հարություն Առաքելյանը, ով այսօր կուսակցության տարածքների օտարման հարցով հարուցված քրեական գործում վկայի կարգավիճակով է:
-Պարո՛ն Առաքելյան, Տիգրան Սարգսյանի հետ տարիներ տեւած, անգամ սփյուռք տեղափոխված հակամարտության մեջ եք: Կանչվել էիք դատախազություն` կուսակցության տարածքների օտարման հարցով: Սա կապո՞ւմ եք վարչապետի մասին Ձեր վերջին հայտարարությունների հետ:
-Այս գործընթացն արդեն 4 ամիս է` ընթանում է. ո՞նց են ասում` բացատրագիր վերցրին, հարցապնդումներ արեցին, թե հարցաքննություն, նյութեր էին նախապատրաստվում, ու ոչ մի բան չգտան, տեսան, որ ես միանձնյա ոչ մի բան չեմ արել, երկու տարածք ունենք վաճառած, որոնք կոլեգիալ որոշումներով են ընդունվել: Ասուլիսիցս առաջ երեկ ինձ զանգեցին եւ հայտնեցին, որ քրեական գործ է հարուցվել: Ասում եմ` «ո՞նց, հանցակազմ չկար, պիտի կարճեիք, հանկարծ քրեական գո՞րծ»: Ինձ ասացին, որ քրեական գործը փաստի առթիվ է, որ ես վկա եմ, բայց Հակոբ Ավետիքյանի մեղադրանքներն իմ դեմ են. օդից մարդ են գտել, ինչ-որ Սլավա Սարգսյան, որը բողոքել է: Ես ասում եմ` էդ Սլավա Սարգսյանին ոչ մեկը չի տեսել, Ձեզ էլ խնդրում եմ` մի հատ պարզեք` էդ ով է, որ տեսնեք, հարցրեք` ունե՞ս կուսակցական թերթիկ, անդամատոմս, ո՞ր ակումբից ես եղել: Ես էդ հարցում մամուլի աջակցության կարիքն ունեմ: Ինչ վերաբերում է, որ ինչի հետ եմ կապում էս ամեն ինչը, կապում եմ տարիներ շարունակ իմ բարձրաձայնումների, տասնյակ հարցաշարերի հետ, որ ինչո՞ւ է էս հարցը սենց, արդյո՞ք ճիշտ ա, որ «Նաիրիտ»-ի պայթյունից առաջ գումարներ եք դուրս գրել… Ինչ վերաբերում է Տիգրան Սարգսյանին, ես ֆաքսերով ապացուցեցի, որ էդ տարածքների մասին Ավետիքյանի հոդվածը եւ արդարադատության (ռեգիստրի-Ա.Դ.) չգրանցելը մեկ կետից է կազմակերպված. իմ ֆաքսերը գնացել էին արդարադատության նախարարություն, բայց կառավարության լրատվականն է լուրը (պատասխանը-Ա.Դ.) տարածում: Իրենք բացահայտվեցին, որ սա մեկ կետից ղեկավարվող ակցիա է: Ի դեպ, այսօր գնացել էի նախարարություն, որովհետեւ իրենք օրենքով ինձ պետք է մեկամսյա ժամկետում մերժեին, իսկ իրենք այդ ժամկետը խախտեցին ու եթե ոչ մի բան չեն անում, էդ դիմումը համարվում է հաստատված: Գնացի, էդ օրենքը դրեցի դեմները, ասացի իմ ատենապետության գրանցումը տվե՛ք: Նամակը դրել եմ, թողել-գնացել եմ, թող զանգեն, կանչեն, գրանցեն:
-Իրենք էլ տարածել էին, որ Դուք շանտաժի եք ենթարկում Սարգսյանին, որ Ձեզ վերականգնեն ՀՌԱԿ ատենապետի պաշտոնում:
-Եթե էդ ֆաքսը կարդաք, գրված է. «Օրենքով պահանջված հասանելի գրանցումը», որովհետեւ մի անգամ մերժեցիք, ասացիք` սխալներ կան, բայց հատուկ նույն համագումարը նորից արեցինք, մի ամիս հետո նորից մերժեցին, թե դուք 19-րդ չպետք է անեիք, այլ 20-րդը: Երկու հատ 19 ենք արել: Մենք էլ ասում ենք` էն ժամանակ ասեիք, որ 19 անեինք: Կիրակի օրը 20 էլ արեցինք, 21-ն էլ կանենք, 22-ն էլ, 35-ն էլ, մեկ ա` կուսակցությունը նույն որոշումն է ընդունում, նույն մարդիկ են, ու չի կարող պետությունը մարդ նշանակի կուսակցությունում` ատենապետ: Խոսքն արդարադատության նախարարության մասին է` Անտինյան-Փանտինյան, դա չէ էականը: Այլ որ համագումարն է որոշում` ով է կուսակցության ղեկավարը:
-Ճիշտ է, վաղուց եք վարչապետի դեմ հայտարարություններ անում, բայց հիմա Ձեր հակամարտությունը նոր երանգ է ստացել: Առավել եւս, որ Դուք մտերիմ եք Հովիկ Աբրահամյանի հետ:
-Չկա մեկը, որ կարողանա նման բան ապացուցի: Հովիկ Աբրահամյանին ես վերջին անգամ հանդիպել եմ մի 4 տարի առաջ: Ոչ մի բարեկամական, գաղափարական կապ չկա, սրանք հերյուրանքներ են եւ պետք է ինձ փորձեն կապել որեւիցե մեկի հետ: Ես դա ցավագին չեմ ընդունում, կրթության, ճաշակի հարց է, ով ինչ ուզում է` ասի: Իմ խիղճը մաքուր է, ես անձնական հարց չեմ բարձրացրել, բարձրացրել եմ պետության ունեցվածքի հարց. բաժնեթղթերը պետական էին, նվեր է տրվել օֆշորային գոտու կազմակերպությանը, որը տարել, այդ ակցիաները գրավ է դրել եւ այլն: Հիմա իմ ասածն էս է, ասում եմ` դու ԿԲ-ի եւ «Մեժգոսբանկ»-ի նախագահն էիր, որ ինչ-որ մի շուստրի կազմակերպություն գործարանը գրավ է դրել 70 միլիոնով, մուծել 39 միլիոն:
-Ձեզ որտեղի՞ց այդ փաստերը:
-Ո՞նց որտեղից, «Մեժգոսբանկ»-ի սայթը բացում, տեսնում ենք, տարբեր մարդկանց եմ հանդիպել, նախկին տնօրենների եմ հանդիպել, ինքս հոդվածներ եմ գրել, ռուսական վերլուծություններ եմ նայել: Ուզում եք քննիչներից շո՞ւտ ինձ հարցաքննեք:
-Դուք բացառո՞ւմ եք, որ Ձեր դեմ քրեական գործ կհարուցեն:
-Չեմ բացառում, բայց դա ինձ համար 5-րդական ա: Ասենք` հարուցեցին, ես իմ ուսումնասիրություններն իրավունք ունեմ անելու, իրավունք ունեմ թերթ կարդալ, տեսաերիզներ նայել, ռադիո լսել, վերլուծական հոդվածներ կարդալ: Եւ դրանից եզրակացության գալ ու այն ներկայացնել հանրությանը:
.gif)
