Ֆինլանդիայի Վանտաա քաղաքում ընթացող ազատ ոճի ըմբշամարտի Եվրոպայի առաջնությունը այսօր կհատի եզրագիծը: Մեր մարզիկներից պայքարի կելնեն Գրիգոր Գրիգորյանը /70 կգ/ և Մուսա Մուրթազալիևը /86 կգ/: Իսկ երեկ մեդալակիր դառնալու հույս էինք փափայում գերծանրքաշային Անդրանիկ Գալստյանի հետ:
Ճիշտ է, նա մեկնարկում պարտվեց թուրք մրցակցին, բայց սփոփիչ գոտեմարտում մեծ առավելությամբ հաղթեց /12 : 2/ բելառուս Վադիմ Շվեդովին: Կիսաեզրափակիչ մտնելու և բրոնզե մեդալակիր դառնալու համար Անդրանիկին մնում էր առավելության հասնել ուկրաինացի Ալեքսանդր Խոցյանովսկու նկատմամբ: Ավաղ, հակառակը ստացվեց և ապարանցի ըմբիշը բավարարվեց հինգերորդ տեղով: Ինչ վերաբերում է թուրք Թահա Ակգյուլին ,որը առաջին գոտեմարտում հաղթել էր մեր ըմբիշին, ասենք, որ նա մտավ եզրափակիչ, որտեղ չոր` 10 : 0 հաշվով «նոկաուտի ենթարկեց» ռուսաստանցի Ալան Խուգաևին և երրորդ անգամ հռչակվեց Եվրոպայի չեմպիոն:
Վաղը` ապրիլի հինգին, մրցագորգը կտրամադրվի Եվրոպայի առաջնութան մասնակից հունահռոմեական ոճի ըմբիշներին: Մեր երկրի մարզական դրոշի պատիվը կպաշտպանեն Կարեն Ասլանյանը /59 կգ/ ,Արամ Ջուլֆալակյանը /66 կգ/, Վարշամ Բորանյանը /71 կգ/, Արսեն Ջուլֆալակյանը /75 կգ/, Հրաչյա Հովհաննիսյանը /80 կգ/, Մաքսիմ Մանուկյանը /85 կգ/, Արթուր Ալեքսանյանը /98 կգ/ և գերծանրքաշային Վաչիկ Եղիազարյանը:
ՀԱՕԿ –ի լրատվության բաժին
.gif)
