ՎԱՐՈՐԴԻ ՄԵՔԵՆԱՆԵՐԸ ԱՅՐԵԼՈՒ ԳՈՐԾՈՎ ԿԱ ՁԵՐԲԱԿԱԼՎԱԾ

Իրավապահ համակարգում կասկածելի է այն հանգամանքը, որ Երեւանի փոխքաղաքապետի վարորդի անվամբ հաշվառված Lexus մակնիշի ավտոմեքենաները, որոնք այրել են, հենց նրան են պատկանում։ Չի բացառվում, որ փոխքաղաքապետի վարորդին փաստացի պատկանող մեքենաները այրելով՝ կոնկրետ անձինք Արմեն Փամբուխչյանին են փորձել «բան հասկացնել», ինչը, օրինակ, կատարվեց ՔՊ-ական Հայկ Սարգսյանի ընտանիքին պատկանող խանութի տարածքում՝ պայթյուն իրականացնելով։

Ավելին՝ «Ժողովուրդ» օրաթերթին ՀՀ քննչական կոմիտեից հայտնեցին, որ կա նախաձեռնված քրեական վարույթ՝ ՀՀ քրեական օրենսգրքի 264-րդ հոդվածի 2-րդ մասի 2-րդ կետի հատկանիշներով։ Մեկ անձ, հանցավոր արարքը կատարելու հիմնավոր կասկածի հիմքով, ձերբակալված է։ Նախաքննությունը շարունակվում է։

Ինչ զարգացումներ եղան կասկածելի հրդեհից առաջ:

«Ժողովուրդ» օրաթերթը գրել էր. «Մեր տեղեկություններով՝ Անդրանիկ Քոչարյանը ՔՊ-ականների մոտ վստահ պնդել է, թե Երեւանի փոխքաղաքապետ Արմեն Փամբուխչյանի ԱԺ նախկին պատգամավոր Մհեր Սեդրակյանի որդուց՝ Դավիթ Սեդրակյանից, ավտոմեքենա է նվեր ստացել, թաքցրել հանրությունից, իր թիմից: «Ժողովուրդ» օրաթերթը այս հարցադրումներով դիմել էր Արմեն Փամբուխչյանին՝ պարզելու, թե որքանով են իրական այս տեղեկությունները, եւ պատրաստվում է արդյոք Արմեն Փամբուխչյանը աշխատանքից ազատման դիմում գրել եւ հրաժարվել Երեւանի ավագանու իր մանդատից: Սակայն Փամբուխչյանը, մեր այս հարցերին ի պատասխան, նշեց, որ տեղեկությունները իրականությանը չեն համապատասխանում։ Տեղեկացնենք, որ Արմեն Փամբուխչյանը 2021 թվականին գնել է LEXUS մակնիշի մեքենա, իսկ ահա փոխքաղաքապետի կինը տարվա ընթացքում մեքենաներ է գնել եւ վաճառել»։

Ահա այս հրապարակումից երկու օր անց հրդեհում են վարորդին պատկանող մեքենաները, ինչը կասկածի տեղիք է տալիս:

Հիշեցնենք, որ նոյեմբերի 24-ին առեղծվածային դեպք էր տեղի ունեցել Երեւանում։ Հրդեհ էր բռնկվել Նոր Արեշ 44 փողոցի տներից մեկի առաջին հարկում գտնվող ավտոտնակում, որտեղ կայանված 2 Lexus մակնիշի ավտոմեքենաներից մեկը ամբողջությամբ այրվել էր, մյուսն էլ դարձել ոչ շահագործելի։

ArmLur.am-ի տեղեկություններով՝ հրդեհված Lexus-ները Երեւանի փոխքաղաքապետ Արմեն Փամբուխչյանի վարորդի անունով են եղել՝ դրանք Հայաստան են բերվել Փամբուխչյանի վարորդի անունով։